ශ්රී ලංකා මුහුදු තීරය ආසන්නයේදී ඉරාන නෞකාවකට එල්ල වූ ප්රහාරය සහ ඉන් අනතුරුව උද්ගත වූ තත්ත්වය හමුවේ විපක්ෂය ක්රියා කළ ආකාරය පිළිබඳව මේ වන විට දැඩි දේශපාලනික කතාබහක් නිර්මාණය වී තිබේ. දෙවැනි ඉරාන නෞකාව ද මෙරට මුහුදු සීමාව ආසන්නයට පැමිණීමත් සමඟ මෙම නොසන්සුන්කාරී තත්ත්වය වඩාත් උග්ර වූ අතර, ඊයේ පාර්ලිමේන්තුවේදී විපක්ෂ මන්ත්රීවරුන් දැක්වූ අදහස් දැඩි විවේචනයට ලක්ව ඇත.
විශේෂයෙන්ම අදාළ නෞකාවල ළමුන් 300ක් සිටින බවට විපක්ෂය සිදුකළ ප්රකාශය පිළිබඳව රජයේ අවධානය යොමුව ඇති අතර, එම ප්රකාශයේ සත්යතාව පිළිබඳව ජනාධිපතිවරයාගෙන් ද කරුණු විමසීමට පියවර ගෙන තිබේ. පාර්ලිමේන්තු මන්ත්රී අජිත් පී. පෙරේරා මහතා ඊයේ පාර්ලිමේන්තුවේදී සිදුකළ ප්රකාශය සම්බන්ධයෙන් අදහස් දක්වමින් නව ප්රජාතන්ත්රවාදී ජාතික සංවිධානයේ ජාතික සංවිධායක නිලුක්ෂ කුමාර මහතා කියා සිටියේ, පාර්ලිමේන්තු වරප්රසාදවලට මුවා වී මෙවැනි අසත්ය තොරතුරු ජනගත කිරීම නොකළ යුතු බවයි.
දේශීය හා ජාත්යන්තර වශයෙන් සංවේදී මෙවැනි ආරක්ෂක කරුණු සම්බන්ධයෙන් වගකීම් විරහිතව ප්රකාශ නිකුත් කිරීම රටේ ප්රතිරූපයට මෙන්ම ජාතික ආරක්ෂාවට ද බලපෑමක් විය හැකි බව රජයේ පාර්ශවයන් පෙන්වා දෙයි. පාර්ලිමේන්තුව තුළ ඇති මුක්තිය (Immunity) භාවිතා කරමින් ජනතාව නොමග යවන තොරතුරු ප්රචාරය කිරීම වහාම නතර කරන ලෙස ද මෙහිදී විපක්ෂයට අවවාද කර ඇත.
