ඉරානය සමඟ පවතින දරුණු යුදමය වාතාවරණය මධ්යයේ ඊශ්රායලයේ ප්රධාන යුද අරමුණු තුනක් අග්රාමාත්ය බෙන්ජමින් නෙතන්යාහු මහතා ඊයේ (මාර්තු 19) නිල වශයෙන් ප්රකාශයට පත් කළේය. “ඔපරේෂන් රයිසින් ලයන්” ලෙස නම් කර ඇති මෙම යුද මෙහෙයුම හරහා ඉරාන අයතුල්ලා පාලනයෙන් එල්ල වන පැවැත්ම පිළිබඳ තර්ජන ඉවත් කිරීම සිය අරමුණ බව ඔහු අවධාරණය කළේය.
පළමු අරමුණ ලෙස ඉරානයෙන් එල්ල වන න්යෂ්ටික තර්ජනය සම්පූර්ණයෙන්ම තුරන් කිරීම සහ දෙවනුව එරට සතු බැලිස්ටික් මිසයිල තර්ජනය ඉවත් කිරීම ඔහු සඳහන් කළේය. මෙම තර්ජන ද්විත්වයම භූගත ආරක්ෂිත ස්ථාන කරා ගෙන යාමට පෙර ගුවන් ප්රහාර මගින් විනාශ කළ යුතු බව ඔහු පෙන්වා දුන්නේය. තෙවන අරමුණ ලෙස ඉරාන වැසියන්ට තම අනාගතය සහ නිදහස තමන්ටම තීරණය කර ගැනීමට හැකි වාතාවරණයක් නිර්මාණය කිරීම ඔහු නම් කළේය.
තමන් මියගොස් ඇති බවට පැතිර ගිය කටකතාවලට පිළිතුරු දෙමින් “මා තවමත් ජීවතුන් අතර සිටින බවට ඔබ සැම සාක්ෂිකරුවන්” යැයි ඔහු මාධ්ය හමුවේදී ප්රකාශ කළේය. ඇමෙරිකානු ජනාධිපති ඩොනල්ඩ් ට්රම්ප්ගේ නායකත්වය අගය කළ ඔහු, ඇමෙරිකාව සහ ඊශ්රායලය එක්ව පෙර නොවූ විරූ ශක්තියකින් ඉරානයට එරෙහිව ක්රියා කරන බව ද වැඩිදුරටත් පැවසීය.
