ඉතාලියේ උතුරුදිග ෆෝර්ලි (Forlì) නගරයේ ගිලන් රථ රියදුරෙකු වයෝවෘද්ධ රෝගීන් පස්දෙනෙකු ඝාතනය කළ බවට සැකපිට එරට පොලිසිය සහ නීති අංශ විසින් විශේෂ විමර්ශනයක් ආරම්භ කර තිබේ. දැනට ඉතාලි රතු කුරුස සංවිධානයේ සේවයෙන් තාවකාලිකව නෙරපා ඇති මෙම 27 හැවිරිදි පුද්ගලයා, රෝහල් සහ රැකවරණ මධ්යස්ථාන අතර රෝගීන් ප්රවාහනය කරන අතරතුර ඔවුන්ට හානිකර ද්රව්ය ශරීරගත කර ඇති බවට සැක කෙරේ. මෙම සැකකටයුතු මරණ සියල්ලම සිදුව ඇත්තේ අදාළ රියදුරා විසින් පදවන ලද ගිලන් රථ තුළදී හෝ ඒවායේ ගමන් කිරීමෙන් සුළු වේලාවකට පසුව වීම විශේෂත්වයකි.
විමර්ශන අංශ පවසන පරිදි, මෙම රෝගීන් පස්දෙනාම ගිලන් රථය තුළදී හදිසි හෘදයාබාධයන්ට ලක්ව ඇති අතර ඉන් එක් අයෙකු ගමන අතරතුරදීත්, අනෙක් පිරිස ඉන් දින කිහිපයකට පසුවත් මියගොස් ඇත. වඩාත්ම මෑතකදී වාර්තා වූ සිද්ධිය වන්නේ 2025 නොවැම්බර් මාසයේදී 85 හැවිරිදි කාන්තාවක් මියයාමයි. මුලින් මෙම මරණ ස්වාභාවික රෝගාබාධ නිසා සිදුවූ බවට පවුලේ ඥාතීන් විශ්වාස කළද, එක් වින්දිතයෙකුගේ පවුලේ අය මළ සිරුර පශ්චාත් මරණ පරීක්ෂණයකට යොමු කරන ලෙස කළ ඉල්ලීමත් සමඟ මෙම බරපතල අක්රමිකතාව පිළිබඳව සැකය මතු වී තිබේ.
මෙම ගිලන් රථ සාමාන්යයෙන් හදිසි අනතුරු සඳහා භාවිතා කරන ඒවා නොවන අතර, රැකවරණ මධ්යස්ථානවල සිටින රෝගීන් වෛද්ය පරීක්ෂණ සඳහා රෝහල් වෙත රැගෙන යාමට භාවිතා කරන ඒවා වේ. එබැවින් මෙම රථ තුළ හෙදියන් හෝ වෛද්යවරුන් නොසිටින අතර රියදුරන් දෙදෙනෙකු පමණක් සිටීම සැකකරුට මෙම අපරාධය කිරීමට මග පාදා දී ඇති බව නීතිඥවරු පෙන්වා දෙති. සැකකරුට එරෙහිව දරුණු ගණයේ මිනීමැරුම් චෝදනා එල්ල වී ඇති අතර, ඔහු සිතාමතාම වස විස හෝ වෙනත් උපක්රමශීලී ක්රම මගින් මෙම ඝාතන සිදු කර ඇති බවට පැමිණිල්ල පාර්ශ්වය තර්ක කරයි.
ඉතාලි රතු කුරුස සංවිධානය මෙම සිදුවීම පිළිබඳව සිය දැඩි කම්පනය පළ කර ඇති අතර, විමර්ශන සඳහා පූර්ණ සහාය ලබා දෙන බව ප්රකාශ කර තිබේ. කෙසේ වෙතත්, සැකකරුගේ නීතිඥවරිය පවසන්නේ තම සේවාදායකයා මෙම චෝදනා ප්රතික්ෂේප කරන බවත්, මියගිය පිරිස බරපතල ලෙස රෝගාතුරව සිටි අය බවත්ය. විමර්ශන කටයුතු පුළුල් කිරීමත් සමඟ තවත් වින්දිතයන් සිටීද යන්න පිළිබඳව බලධාරීන් මේ වන විට අවධානය යොමු කර ඇත.
