කලාපීය ආරක්ෂක වටපිටාවේ සිදුවන වෙනස්කම් සැලකිල්ලට ගනිමින්, සිය ආරක්ෂක උපකරණ සහ තාක්ෂණික අපනයන සීමාවන් ලිහිල් කිරීමට ජපාන රජය ඊයේ (අඟහරුවාදා) අනුමැතිය ලබා දී තිබේ. ජපාන අග්රාමාත්ය සානා තකයිචි (Sanae Takaichi) මහත්මිය ප්රකාශ කළේ අද පවතින බරපතල ආරක්ෂක පරිසරය හමුවේ කිසිදු රටකට තනිවම සාමය සහ ආරක්ෂාව තහවුරු කර ගත නොහැකි බවයි.
මීට පෙර ජපානයේ අපනයන ප්රතිපත්තිය සීමා වී තිබුණේ මුදාගැනීමේ මෙහෙයුම්, ප්රවාහනය, නිරීක්ෂණ සහ බෝම්බ නිෂ්ක්රීය කිරීම වැනි සහන සේවා සඳහා පමණි. නමුත් නව සංශෝධන හරහා පුළුල් ආරක්ෂක අරමුණු වෙනුවෙන් මාරාන්තික ආයුධ සහ උපකරණ මිත්ර රටවලට අලෙවි කිරීමට ජපානයට දැන් අවස්ථාව හිමි වේ.
ආයුධ අපනයන තහනම සම්පූර්ණයෙන්ම ඉවත් කර ඇති බවට නැගෙන චෝදනා ප්රතික්ෂේප කරමින් අග්රාමාත්යවරිය පවසා සිටියේ, මෙම අපනයන තදින්ම ආරක්ෂක අරමුණු (Defensive purposes) සඳහා පමණක් සීමා වන බවයි. ජපානය තවමත් සාමකාමී රටක් ලෙස ජාත්යන්තර අපනයන පාලන නීතිවලට අනුකූලව කටයුතු කරන බව ඇය අවධාරණය කළාය.
මෙම ප්රතිපත්තිමය වෙනසත් සමඟ මිට්සුබිෂි (Mitsubishi) සමාගම ඔස්ට්රේලියානු නාවික හමුදාව සඳහා යුද නැව් (Frigates) තුනක් සැපයීමට ඩොලර් බිලියන 7.15ක දැවැන්ත ගිවිසුමකට අත්සන් තබා ඇත. එහි පළමු නැව 2029 වසරේදී ලබා දීමට නියමිත අතර මෙය ජපානය සහ ඔස්ට්රේලියාව අතර ආරක්ෂක කර්මාන්ත සහයෝගීතාවයේ සුවිශේෂී සන්ධිස්ථානයක් ලෙස සැලකේ.
මෙම පියවර හරහා ජපානය සිය පැසිෆික් කලාපීය මිත්ර රටවල් සමඟ පවතින ආරක්ෂක සබඳතා තවදුරටත් ශක්තිමත් කිරීමට අපේක්ෂා කරයි.
