මොණරාගල, වැල්ලවාය කොටිකම්බොක්ක රජයේ රක්ෂිතය තුළ පිහිටි ඉහළ වාණිජ වටිනාකමකින් යුතු ධමණි තිරුවානා (ක්වාට්ස්) නිධිය විධිමත් ලෙස කැණීම් කර රටේ ආර්ථිකයට දායක කර ගැනීමට රජය සැරසෙයි. කර්මාන්ත අමාත්ය සුනිල් හඳුන්නෙත්ති මහතා පසුගියදා මෙම ප්රදේශයේ නිරීක්ෂණ චාරිකාවක නිරත වෙමින් එහි ඇති සක්යතාව පිළිබඳව සොයා බැලීය. මෙට්රික් ටොන් මිලියන 0.31ක් පමණ අන්තර්ගත මෙම නිධිය, මෙරට පවතින ඉතා ඉහළ ගුණාත්මක භාවයකින් යුතු ඛනිජ නිධියක් ලෙස භූ විද්යා හා පතල් කාර්යාංශය හඳුනාගෙන තිබේ.
කෙසේ වෙතත්, මෙම කැණීම් කටයුතු ආරම්භ කිරීමට පෙර විධිමත් පරිසර බලපෑම් තක්සේරුවක් (EIA) සිදු කිරීම අත්යවශ්ය බව පරිසරවේදීන් සහ වාරි ඉංජිනේරුවන් දැඩිව අවධාරණය කරයි. අලිකොටආර ජලාශයේ බැම්ම මෙම නිධියට ඉතා ආසන්නව පිහිටා ඇති බැවින්, කැණීම් සඳහා සිදු කරන පිපිරවීම් මඟින් ජලාශයේ බැම්මට, සොරොව්වට සහ පිටවානට බරපතළ හානි සිදුවිය හැකි බවට වාරි ඉංජිනේරුවන් අනතුරු අඟවා ඇත. එසේම, රක්ෂිත වනාන්තරයේ වන වැස්ම ඉවත් කිරීම නිසා සිදුවන පාංශු ඛාදනයෙන් ජලාශය රොන්මඩවලින් පිරී යාමේ අවදානමක් ද පවතී.
වසර ගණනාවක් පුරා දේශපාලන බලපෑම් මත අවිධිමත් ලෙස සිදු කළ කැණීම් හේතුවෙන් 2015 වසරේදී මෙම නිධියේ වැඩකටයුතු නතර කර තිබුණි. වත්මන් රජය මෙය නැවත ආරම්භ කිරීමට සලකා බැලීමේදී, පවතින නීතිමය සහ පාරිසරික ගැටලු නිරාකරණය කර ගනිමින් විනිවිදභාවයකින් යුතුව කටයුතු කරන බව අමාත්යවරයා ප්රකාශ කර ඇත. වන සංරක්ෂණ දෙපාර්තමේන්තුව පවසන්නේ මෙතෙක් නිල වශයෙන් ඉල්ලීමක් ලැබී නැති නමුත්, යෝජනාවක් ඉදිරිපත් වුවහොත් පාරිසරික බලපෑම් පිළිබඳව දැඩි ලෙස සලකා බලන බවයි.
