කාන්තා ශූරයන්ගේ ලීග් (Women’s Champions League) තරගාවලියේ තියුණු තරගයකින් අනතුරුව ජර්මනියේ වුල්ෆ්ස්බර්ග් (Wolfsburg) කණ්ඩායම පරාජය කරමින් වත්මන් ශූරියන් වන ආර්සනල් (Arsenal) කණ්ඩායම සමඟ අවසන් පූර්ව වටයේ තරග වැදීමට ප්රංශයේ ලියෝන් (Lyon) කාන්තා කණ්ඩායම සුදුසුකම් ලබා තිබෙනවා. ජර්මනියේදී පැවති පළමු අර්ධයේ තරගය එකට බිංදුවක් ලෙස වුල්ෆ්ස්බර්ග් කණ්ඩායම ජයග්රහණය කර තිබූ නමුත්, දෙවන තරගයේදී ලියෝන් ක්රීඩිකාවන් දැක්වූ විශිෂ්ට දක්ෂතා හේතුවෙන් හතරට බිංදුවක් ලෙස එම තරගය ජයග්රහණය කරමින් සමස්ත ප්රතිඵලය හතරට එකක් ලෙස සටහන් කර ගනිමින් ඔවුන් මෙම ජයග්රහණය වාර්තා කළා.
ලියෝන් ක්රීඩාංගණයේදී පැවති මෙම තීරණාත්මක තරගයේ දහසයවන මිනිත්තුවේදීම අමෙරිකානු මැදපෙළ ක්රීඩිකා ලිලී යොහානස් (Lily Yohannes) ලබාගත් ගෝලයත් සමඟ සමස්ත ලකුණු තත්ත්වය එකට එකක් ලෙස සම කිරීමට ඔවුන්ට හැකි වුණා. තරගයේ පළමු අර්ධය පුරාම ලියෝන් කණ්ඩායම දැඩි ආධිපත්යයක් පවත්වාගත් අතර වුල්ෆ්ස්බර්ග් කණ්ඩායමට පළමු අර්ධය තුළදී ලියෝන් දැල දෙසට එකදු සාර්ථක එල්ලයක්වත් එල්ල කිරීමට අවස්ථාව ලැබුණේ නැහැ. කෙසේ වෙතත් නියමිත කාලය අවසන් වන තෙක්ම තවත් ගෝලයක් ලබා ගැනීමට ලියෝන් කණ්ඩායමට නොහැකි වූ බැවින් තරගය අතිරේක කාලය (Extra Time) දක්වා දීර්ඝ කෙරුණා.
අතිරේක කාලයේදී සිය සුපුරුදු රිද්මයට අවතීර්ණ වූ ලියෝන් කණ්ඩායම වෙනුවෙන් මෙල්චි ඩුමෝර්නේ (Melchie Dumornay), ඩමාරිස් එගුරෝලා (Damaris Egurrola) සහ ටැබිතා චාවින්ගා (Tabitha Chawinga) තවත් විශිෂ්ට ගෝල ත්රිත්වයක් වාර්තා කරමින් සිය කණ්ඩායමේ ජයග්රහණය තහවුරු කළා. මේ අනුව ලබන අප්රේල් 25 හෝ 26 යන දිනයන්හිදී පැවැත්වෙන අවසන් පූර්ව වටයේ පළමු තරගයේදී ඔවුන් ආර්සනල් කණ්ඩායම සමඟ තරග වැදීමට නියමිතව ඇති අතර සතියකට පසු දෙවන තරගය ප්රංශයේදී පැවැත්වීමට නියමිතයි. අනෙක් අවසන් පූර්ව තරගයේදී බාසිලෝනා කණ්ඩායම සහ බේයර්න් මියුනිච් කණ්ඩායම එකිනෙකාට එරෙහිව තරග බිමට පිවිසෙනවා.
