මහවැලි සී කලාපයේ 2026 යල කන්නය සඳහා වාරි ජලය නිකුත් කිරීම ඊයේ (අප්රේල් 20) උල්හිටිය රත්කිඳ මහා ජලාශයේදී ඉතා උත්සවාකාරයෙන් ආරම්භ විය. සී කලාපයේ නේවාසික ව්යාපාර කළමනාකාර උභය කල්යාණ කුමාර මහතාගේ ප්රධානත්වයෙන් සහ ගොවි සංවිධාන නියෝජිතයන්ගේ සහභාගිත්වයෙන් මෙම කටයුතු සිදු කෙරුණේ දේශීය කෘෂි චාරිත්රවලට මුල්තැන දෙමිනි. මෙවර යල කන්නයේදී හෙක්ටයාර් 23,000ක භූමි ප්රමාණයක් වගා කිරීමට සැලසුම් කර ඇති අතර ඒ සඳහා මුදාහරිනු ලබන වාරි ජලය මාවනාගම, හෙනානිගල-පුස්සලවින්න සහ බඹරවාන යන ප්රධාන ජලාශ හතරට මුලින්ම යොමු කෙරේ. අනතුරුව තවත් කුඩා ජලාශ 50ක් සහ බෙදුම් ඇළ මාර්ග ඔස්සේ වගාබිම් වෙත ජලය ගලා යාමට කටයුතු සලසා ඇත.
මෙවර යල කන්නයේදී හෙක්ටයාරයකින් මෙට්රික් ටොන් 08ක ඉහළ අස්වනු ඉලක්කයක් ජය ගැනීමට අපේක්ෂා කරන බව බලධාරීන් මෙහිදී සඳහන් කළහ. නිකුත් කරන වාරි ජලය ඉතා අරපිරිමැස්මෙන් භාවිත කරන ලෙසත්, වගා කළ හැකි සෑම බිම් කොටසක්ම උපරිම ලෙස භාවිත කරමින් ඵලදායී වගාවන් සඳහා යොදා ගන්නා ලෙසත් ගොවි ජනතාවට උපදෙස් ලබා දී තිබේ. රටේ ආහාර සුරක්ෂිතතාව වෙනුවෙන් ගොවි ජනතාවට උපරිම සහය ලබා දීමට මහවැලි අධිකාරිය සූදානම් අතර ජලය අපතේ නොයවා සාර්ථක අස්වැන්නක් කරා යාමට කැප විය යුතු බව කළමනාකාරවරයා වැඩිදුරටත් අවධාරණය කළේය.
