ඓතිහාසික බදුල්ල නගරය දිවයිනේ ප්රධාන ආර්ථික, පරිපාලන සහ සංචාරක මධ්යස්ථානයක් ලෙස නවීකරණය කිරීමේ දැවැන්ත වැඩපිළිවෙළක් රජය විසින් ආරම්භ කර තිබේ. බදුල්ල මහ නගරාධිපති නන්දන හපුගොඩ මහතා පවසන පරිදි, සමස්ත සැලැස්ම යටතේ සංවර්ධන ව්යාපෘති 25ක් ක්රියාත්මක වන අතර එහි පළමු අදියර සඳහා පමණක් රුපියල් කෝටි 100ක ප්රතිපාදන මධ්යම රජය මගින් වෙන් කර ඇත.
මෙම නව සංවර්ධන සැලැස්ම යටතේ ක්රියාත්මක වන ප්රධාන අංග කිහිපයක් හඳුනාගෙන තිබේ. ඒ අතරින් බදුල්ල මධ්යම බස් නැවතුම්පොළ සහ දුම්රිය ස්ථානය යා කරමින් ඉදිවන බහු විධ ප්රවාහන මධ්යස්ථානය (Multi-modal Transport Hub) සුවිශේෂී වේ. මීට අමතරව නගරයේ මාර්ග පුළුල් කිරීම, විකල්ප මාර්ග ඉදිකිරීම සහ නවීන වෙළෙඳ සංකීර්ණ ස්ථාපනය කිරීම හරහා නගරයේ පවතින තදබදය අවම කිරීමට අපේක්ෂිතය.
සංචාරක ක්ෂේත්රය ප්රවර්ධනය කිරීම සඳහා බදුලු ඔය සහ කුඩා ඔය දෙපස ඉවුරු අලංකාර කර සංචාරක ආකර්ෂණීය ස්ථාන ලෙස සකස් කිරීමට ද සැලසුම් කර ඇත. ප්රදේශයේ පිහිටි පුරාවිද්යාත්මක වටිනාකමකින් යුත් ස්ථාන 35ක් සංරක්ෂණය කර වැඩිදියුණු කිරීමත්, නව සංස්කෘතික මධ්යස්ථානයක් ඉදිකිරීමත් මෙම සැලැස්මේ වැදගත් කොටසකි.
නගරයේ යටිතල පහසුකම් සංවර්ධනය යටතේ සනීපාරක්ෂක පහසුකම් ඉහළ නැංවීම සහ ක්රමවත් අප ජලය බැහැර කිරීමේ පද්ධතියක් ස්ථාපනය කිරීම කෙරෙහි ද අවධානය යොමු කර තිබේ. ඌව පළාත් ආණ්ඩුකාර කාර්යාලයේදී ඊයේ (17) පැවැති විශේෂ සාකච්ඡාවකදී අනාවරණය වූයේ නාගරික සංවර්ධන අධිකාරිය සහ පුරාවිද්යා දෙපාර්තමේන්තුව එක්ව මෙම ව්යාපෘති අධීක්ෂණය කරන බවයි.
මෙම සංවර්ධන කටයුතු නිමවීමත් සමඟ බදුල්ල නගරය දෙස් විදෙස් සංචාරකයන්ගේ ප්රධාන ගමනාන්තයක් බවට පත්වනු ඇති අතරම, ඌව පළාතේ ආර්ථික කේන්ද්රස්ථානය ලෙස එහි කාර්යභාරය තවදුරටත් ශක්තිමත් වනු ඇත.
