සමාජ මාධ්ය ජාලාවලට තරුණ පිරිස් ඇබ්බැහි කරවන බවට එල්ල වී ඇති චෝදනා සම්බන්ධයෙන් පවරා ඇති නඩුවලට පැමිණිලිකරුවන් බඳවා ගැනීම සඳහා ෆේස්බුක් (Facebook) සහ ඉන්ස්ටග්රෑම් (Instagram) ඔස්සේ පළ කර තිබූ දැන්වීම් ඉවත් කිරීමට මෙටා (Meta) සමාගම පියවර ගෙන තිබේ. මෙටා සමාගමේ ප්රකාශක ඇන්ඩි ස්ටෝන් සඳහන් කළේ, සිය සමාගමේ වේදිකාවන් හානිකර බව පවසමින් නඩු පවරන නීතිඥයන්ට එම වේදිකාවන්ම භාවිතා කරමින් ලාභ ලැබීමට ඉඩ දිය නොහැකි බවයි. සමාගම මේ වන විට කැලිෆෝනියාවේ ප්රාන්ත සහ ෆෙඩරල් අධිකරණවල පවතින දහස් සංඛ්යාත නඩුවලට එරෙහිව සක්රීයව පෙනී සිටින බව ද ඔහු වැඩිදුරටත් කියා සිටියේය.
මෙම තීරණය ගනු ලැබුවේ පසුගිය මාර්තු මාසයේදී මෙටා සමාගමට එරෙහිව පැවති ප්රධාන නඩු දෙකකින් එම සමාගම පරාජයට පත්වීමෙන් පසුව, පැමිණිලිකරුවන් බඳවා ගැනීමේ දැන්වීම් විශාල වශයෙන් ඉහළ යාමත් සමඟය. දහස් සංඛ්යාත නඩු මඟින් චෝදනා කරන්නේ සමාජ මාධ්ය විසින් තරුණ පරපුරේ මානසික සෞඛ්යයට බරපතල හානි සිදුකර ඇති බවයි. කෙසේ වෙතත්, තමන්ගේම වේදිකාවන් භාවිතා කරමින් තමන්ට එරෙහිව නඩු ගොනු කිරීමට පුද්ගලයන් පෙළඹවීම වැළැක්වීමට මෙටා සමාගම ගත් මෙම පියවර හරහා දැනට ක්රියාත්මක වන නීතිමය ක්රියාවලීන් තවදුරටත් උණුසුම් වී තිබේ.
