මැදපෙරදිග කලාපයේ පවතින උග්ර යුදමය තත්ත්වය හමුවේ බ්රිතාන්යය සහ ස්පාඤ්ඤය කටයුතු කරන ආකාරය අමෙරිකානු ජනාධිපති ඩොනල්ඩ් ට්රම්ප්ගේ දැඩි දෝෂදර්ශනයට ලක්ව තිබේ. ධවල මන්දිරයේදී ජර්මානු චාන්සලර් ෆෙඩ්රික් මර්ස් (Friedrich Merz) සමඟ පැවැති සාකච්ඡාවකින් අනතුරුව මාධ්ය වෙත අදහස් දක්වමින් ට්රම්ප් පැවසුවේ, ඉරානයට එරෙහි මෙහෙයුම්වලදී ස්පාඤ්ඤය සහ බ්රිතාන්යය කිසිදු සහයෝගයක් ලබා නොදෙන බවයි. විශේෂයෙන්ම බ්රිතාන්යයේ වත්මන් ක්රියාකලාපය හිටපු අගමැති වින්ස්ටන් චර්චිල්ගේ යුගයට වඩා බෙහෙවින් වෙනස් සහ දුර්වල මට්ටමක පවතින බව ඔහු උපහාසාත්මකව පෙන්වා දුන්නේය.
ස්පාඤ්ඤය සිය රටේ පවතින ඒකාබද්ධ හමුදා කඳවුරු ඉරානයට එරෙහි ප්රහාර සඳහා භාවිත කිරීමට අවසර දීම ප්රතික්ෂේප කිරීම සම්බන්ධයෙන් ට්රම්ප් සිය කෝපය පළ කළේය. මෙයට ප්රතිචාරයක් ලෙස ස්පාඤ්ඤය සමඟ පවතින සියලුම වෙළඳ ගනුදෙනු නතර කරන බවට ද ඔහු අනතුරු ඇඟවීය. බ්රිතාන්යය ද සිය ගුවන් කඳවුරු භාවිත කිරීමට අවසර දීම සඳහා දින කිහිපයක් ප්රමාද කිරීම “Special Relationship” හෙවත් දෙරට අතර පවතින සුවිශේෂී සබඳතාව බිඳවැටීමක් ලෙස ඔහු අර්ථ දැක්වීය. මේ අතර, ජර්මනිය ලබා දෙන සහයෝගය අගය කළ ට්රම්ප්, චාන්සලර් මර්ස් “විශිෂ්ට නායකයෙකු” ලෙස ද හඳුන්වන ලදී.
ඉරානය සමඟ පවතින අර්බුදය පිළිබඳව අදහස් දක්වමින් ජනාධිපතිවරයා කියා සිටියේ, ඉරානය දැන් සාකච්ඡා කිරීමට කැමැත්ත පළ කළද එයට දැන් “ප්රමාද වැඩි” (Too Late) බවයි. තමා ප්රහාර එල්ල කිරීම ප්රමාද කළේ නම් ඉරානය විසින් අමෙරිකාවට ප්රහාර එල්ල කිරීමට සූදානමින් සිටි බවත්, එබැවින් පළමුව පහර දීම (Pre-emptive strike) නිවැරදි තීරණයක් බවත් ඔහු අවධාරණය කළේය. මේ වන විට ඉරානයේ නාවික, ගුවන් සහ නායකත්ව ව්යුහය සම්පූර්ණයෙන්ම පාහේ විනාශ වී ඇති බව පැවසූ ට්රම්ප්, ඉරාන වැසියන්ට සිය රටේ පාලනය අතට ගන්නා ලෙස නැවතත් ඇරයුම් කළේය.
