මෑතකදී ඉරානය විසින් එල්ල කරන ලද ප්රහාරයන්ට ප්රතිචාර දැක්වීම සඳහා සෞදි අරාබියේ රියාද් නුවරදී ඊයේ (18) රැස්වූ අරාබි රටවල විදේශ අමාත්යවරුන් විසින් ඒකාබද්ධ ප්රකාශයක් නිකුත් කර තිබේ. මෙම හමුව සඳහා සෞදි අරාබිය, එක්සත් අරාබි එමීර් රාජ්යය (UAE), කටාර්, කුවේට්, බහරේන් සහ ලෙබනනය ඇතුළු කලාපයේ ප්රධාන රටවල් රැසක නියෝජිතයෝ සහභාගී වූහ.
එම ඒකාබද්ධ ප්රකාශය මඟින් ඉරානය විසින් එල්ල කරන ලද ‘සැලසුම්සහගත ප්රහාර’ (Deliberate attacks) දැඩි ලෙස හෙළා දැක ඇති අතර, එම ප්රහාර මඟින් සිවිල් ජනාවාස, යටිතල පහසුකම් සහ රාජ්ය තාන්ත්රික මධ්යස්ථාන ඉලක්ක කර ඇති බව ඔවුන් පෙන්වා දෙයි. කිසිදු හේතුවක් මත මෙවැනි ප්රහාර සාධාරණීකරණය කළ නොහැකි බව අවධාරණය කරන අරාබි නායකයෝ, එක්සත් ජාතීන්ගේ ප්රඥප්තියේ 51 වන වගන්තියට අනුව තමන්ට ස්වයං ආරක්ෂාව සඳහා ඇති අයිතිය (Right to self-defence) ද මෙහිදී මතක් කර දී ඇත.
වහාම මෙම ප්රහාර නතර කරන ලෙසත්, ජාත්යන්තර නීති සහ ‘යහපත් අසල්වැසි සබඳතා’ (Principles of good neighbourliness) සුරැකීමට කටයුතු කරන ලෙසත් අරාබි ජාතීන් ඉරානයෙන් ඉල්ලා සිටියි. විශේෂයෙන්ම ගෝලීය බලශක්ති සැපයුමට තීරණාත්මක වන හෝමුස් සමුද්ර සන්ධිය (Strait of Hormuz) වසා දැමීමට කරන තර්ජනවලින් ඉරානය බැහැර විය යුතු බව එම ප්රකාශයේ සඳහන් වේ.
මීට අමතරව, ලෙබනනයට එරෙහිව ඊශ්රායලය දියත් කර ඇති හමුදා ක්රියාමාර්ග සහ එහි ‘ව්යාප්තවාදී ප්රතිපත්තිය’ (Expansionist policy) ද මෙම අරාබි රටවල ඒකාබද්ධ ප්රකාශය මඟින් දැඩි ලෙස විවේචනයට ලක් කර ඇත. මැදපෙරදිග කලාපය තුළ පවතින මෙම උග්ර නොසන්සුන්තාවය ගෝලීය ආර්ථිකයට සහ ආරක්ෂාවට බරපතල තර්ජනයක් වී ඇති බැවින්, ජාත්යන්තර ප්රජාවේ මැදිහත්වීම මෙහිදී අත්යවශ්ය බව දේශපාලන විචාරකයෝ පවසති.
