ඓතිහාසික මිහින්තලා රජමහා විහාරස්ථානය නැරඹීමට පැමිණි ජර්මානු ජාතික තරුණියකට ලිංගික අපයෝජනයක් සිදු කිරීමට උත්සාහ කළ පුරාවිද්යා කම්කරුවෙකු මිහින්තලය පොලීසිය විසින් අත්අඩංගුවට ගෙන තිබේ. අද (16) දහවල් මෙම තරුණිය පුදබිම නැරඹීමට ගිය අවස්ථාවේදී මෙම අවාසනාවන්ත සිදුවීමට මුහුණ දී ඇත.
සැකකරු විසින් තරුණියව කැලෑව දෙසට ඇදගෙන ගොස් සිය ටී-ෂර්ට් එකෙන් ඇගේ ගෙල සිර කරමින් අපයෝජනයට උත්සාහ කර ඇති බව වාර්තා වේ. ඒ අවස්ථාවේ තරුණිය නැඟූ කෑගැසීම ඇසී පුදබිම වැඳපුදා ගැනීමට පැමිණි පිරිසක් වහා ක්රියාත්මක වී එතැනට දිව ගොස් ඇයව බේරා ගැනීමට කටයුතු කර තිබේ.
අත්අඩංගුවට ගත් සැකකරු පුරාවිද්යා දෙපාර්තමේන්තුවේ කම්කරුවෙකු බව මූලික විමර්ශනවලදී අනාවරණය වී ඇති අතර වින්දිත විදේශීය කාන්තාව වෛද්ය පරීක්ෂණ සඳහා අනුරාධපුර අධිකරණ වෛද්යවරයා වෙත ඉදිරිපත් කර ඇත. සිද්ධිය පිළිබඳ අදහස් දක්වමින් මිහින්තලා රාජමහා විහාරාධිපති පූජ්ය වලහැඟුණු වැවේ ධම්මරතන හිමියන් සඳහන් කළේ පුදබිම තුළ ප්රමාණවත් පොලිස් ආරක්ෂාවක් නොමැති වීම මෙවැනි අපරාධ සිදු වීමට ප්රධාන හේතුවක් බවයි. පසුගිය සිකුරාදා මෙරටට පැමිණි මෙම තරුණිය මුහුණ දුන් සිදුවීම සම්බන්ධයෙන් මිහින්තලය පොලීසිය වැඩිදුර විමර්ශන සිදු කරයි.
