1930 දශකයේ ආරම්භ වූ මිනිපේ ගොවි ජනපදය අක්කර 20,000කට අධික වපසරියකින් යුක්ත වන අතර එයට ජලය සපයනු ලබන්නේ කිලෝමීටර් 74ක් දිගැති මිනිපේ යෝධ ඇළ මඟිනි. යෝධ ඇළෙන් පෝෂණය වන වැව් රැසක් ජනපදය පුරා විසිරී තිබුණද නිසි නඩත්තුවක් නොමැතිකම නිසා ඒවා මේ වන විට ගොඩවෙමින් පවතින බව ගොවීහු පෙන්වා දෙති. විශේෂයෙන්ම හසලක ඔයෙන් පෝෂණය වන හසලක වැව මේ වන විට රොන් මඩ සහ තෘණ වර්ගවලින් පිරී පිට්ටනියක් බවට පත්ව තිබීම කණගාටුදායක තත්ත්වයකි. වසර 40කට පෙර මෙහි තිබූ මඩ සොරොව්ව වසා දැමීම මෙම තත්ත්වයට ප්රධාන හේතුව වී ඇති අතර මීට අමතරව කඳුකර ප්රදේශවල සිදුකරන අක්රමවත් ඉදිකිරීම් සහ රක්ෂිත වනාන්තර කපා දමා සිදුකරන හේන් වගාවන් නිසා වර්ෂා කාලයේදී විශාල වශයෙන් පස් තට්ටු සෝදා විත් වැව්වල තැන්පත් වීමෙන් පස් සෝදා පාලුව උග්ර වී ඇත. වැව් රොන් මඩින් පිරී තිබීම නිසා ජලය රැස් කර තබා ගැනීමට නොහැකි වී ඇති අතර වාරි ජලය හිඟ වන කාලවලදී වගාවන්ට අවශ්ය ජලය ලබා ගැනීමට ක්රමවේදයක් නොමැති වීමෙන් ගොවීහු දැඩි පීඩාවට පත්ව සිටිති.
ගොවි සංවිධාන යෝජනා කරන්නේ මෙම වැව් පිළිසකර කර ජලය රැස් කිරීමට අමතරව ඒවා දෙස් විදෙස් සංචාරක ආකර්ෂණය දිනාගත හැකි දර්ශනීය ජලාශ බවට පත් කරන ලෙසයි. මෙමගින් ප්රදේශයේ ජනතාවට අමතර ආදායම් මාර්ග උදාකර ගැනීමට ද අවස්ථාව සැලසෙනු ඇත. මේ පිළිබඳව අදහස් දැක්වූ වාරිමාර්ග නිලධාරියෙකු සඳහන් කළේ මෙම වැව් සංවර්ධනය කිරීමේ යෝජනාවක් දැනටමත් අදාළ අංශ වෙත ඉදිරිපත් කර ඇති බවයි. විශේෂයෙන් හසලක වැව පිළිබඳව වැඩි අවධානයක් යොමු කර ඇති අතර ගොවීන්ට අවශ්ය පහසුකම් සැලසීමට අවශ්ය සියලු සංවර්ධන කටයුතු සැලසුම් කර ඇති බවද ඔහු වැඩිදුරටත් පැවසීය.
