ඕමාන වෙරළට ඔබ්බෙන් වූ මුහුදු ප්රදේශයේ යාත්රා කරමින් තිබූ MKD VYOM නමැති තෙල් ප්රවාහන නෞකාවකට එල්ල වූ දරුණු ප්රහාරයකින් එහි සේවය කළ අයෙකු ජීවිතක්ෂයට පත්ව ඇති බව විදෙස් මාධ්ය වාර්තා කරයි. මාර්ෂල් දූපත්වල ලියාපදිංචි කර ඇති මෙම නෞකාව මස්කට් නුවරට වයඹ දෙසින් නාවික සැතපුම් 44.4ක් පමණ දුරින් ගමන් කරමින් සිටියදී මෙම අනපේක්ෂිත ප්රහාරයට ලක්ව තිබේ.
ප්රහාරය එල්ල වූ අවස්ථාවේදී නෞකාවේ එන්ජින් කාමරයේ සේවය කරමින් සිටි පුද්ගලයෙකු මෙලෙස මියගොස් ඇති බව එහි කළමනාකාරීත්වය දරන V.Ships ආයතනය විසින් තහවුරු කර ඇත. ප්රහාරයත් සමඟ නෞකාව තුළ ප්රබල පිපිරීමක් සිදුවී ගින්නක් හටගෙන ඇති අතර, එහි සිටි සෙසු නාවික පිරිස දැඩි පරිශ්රමයක් යොදා ගින්න මැඩපැවැත්වීමට සමත්ව තිබේ. මැදපෙරදිග මුහුදු කලාපයේ නාවික ආරක්ෂාව පිළිබඳව යළිත් දැඩි කතාබහක් නිර්මාණය කිරීමට මෙම සිදුවීම හේතු වී ඇත.
