හෝර්මුස් සමුද්ර සන්ධිය ආශ්රිතව පවතින යුදමය නොසන්සුන්තාව හමුවේ අද (මාර්තු 20) ගෝලීය තෙල් වෙළඳපොළේ මිල ගණන් කලාපීය වශයෙන් විශාල පරස්පරතාවක් පෙන්නුම් කරයි. මැදපෙරදිග කලාපයේ ප්රධාන තෙල් දර්ශකයක් වන ‘Murban’ බොරතෙල් මිල සීඝ්රයෙන් ඉහළ ගොස් ඇති අතර ලෝකයේ සෙසු කලාපවල භාවිතා වන Brent සහ WTI මිල ගණන් යම් මට්ටමක පහත වැටීමක් පෙන්නුම් කිරීම විශේෂත්වයකි.
එක්සත් අරාබි එමීර් රාජ්යයෙන් අපනයනය කරන ‘Murban’ බොරතෙල් මිල තනි වෙළඳ සැසියකදී 6%කට වඩා වැඩි අගයකින් ඉහළ ගොස් ඇමෙරිකානු ඩොලර් 131ක් වැනි ඉහළ අගයක් ගෙන තිබේ. මැදපෙරදිගින් සිදුවන තෙල් සැපයුම අඩාල වීම මීට සෘජුවම බලපා ඇත. කෙසේ වෙතත් ජාත්යන්තර මිණුම්දණ්ඩක් වන Brent බොරතෙල් මිල 1.45%කින් පහළ ගොස් ඩොලර් 107.1ක් ලෙසත්, ඇමෙරිකානු WTI බොරතෙල් මිල 2.06%කින් පහළ ගොස් ඩොලර් 94.16ක් ලෙසත් අද උදෑසන වාර්තා විය.
ඉරානය විසින් හෝර්මුස් සමුද්ර සන්ධිය වසා දැමීමට ගෙන ඇති පියවර හේතුවෙන් ඉන්දියාව වැනි රටවල ද්රව පෙට්රෝලියම් ගෑස් (LPG) සැපයුම දැඩි අවදානමකට ලක්ව තිබේ. ඉන්දියාවේ සමස්ත LPG අවශ්යතාවයෙන් විශාල ප්රමාණයක් මැදපෙරදිග කලාපයෙන් ආනයනය කරන බැවින්, මෙම සැපයුම් මාර්ගය අවහිර වීම එරට ගෘහස්ථ සහ කාර්මික බලශක්ති අවශ්යතාවලට සෘජුවම බලපානු ඇත.
හෝර්මුස් සමුද්ර සන්ධිය නාවික ගමනාගමනය සඳහා විවෘතව තබා ගැනීමට සහය වීමට එක්සත් රාජධානිය, ප්රංශය, ජර්මනිය, ඉතාලිය, නෙදර්ලන්තය සහ ජපානය සූදානම් බව ප්රකාශ කර තිබේ. කෙසේ වෙතත් මැදපෙරදිග පවතින දැඩි භෞතික සැපයුම් හිඟය හේතුවෙන් කලාපීය තෙල් මිල තවදුරටත් ඉහළ මට්ටමක පවතිනු ඇතැයි ආර්ථික විශේෂඥයෝ පෙන්වා දෙති.
