අකුරේගොඩදී වෙඩි තබා ඝාතනය කළ නීතිඥ බුද්ධික මල්ලවාරච්චි මහතා තමාගේ නීතිඥ අධ්යයන කණ්ඩායමේ (Study group) සාමාජිකයෙකු බවත්, වර්තමාන ආණ්ඩුවට සිය නීතිඥ කණ්ඩායම පිළිබඳ ගැටලුවක් ඇති බව පෙනී යන බවත් ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා අද (18) ප්රකාශ කළේය. බත්තරමුල්ල, නෙළුම් මාවතේ පිහිටි පක්ෂ මූලස්ථානයේදී පැවැති සාකච්ඡාවකදී ඔහු දැක්වූ අදහස්වල සාරාංශය මෙසේය.
නීතිඥවරයෙකු සහ ඔහුගේ බිරිඳ ඝාතනය කිරීම මෙන්ම, අධිකරණ පද්ධතිය සම්බන්ධයෙන් ආණ්ඩුවේ මැති ඇමතිවරුන් පාර්ලිමේන්තුව තුළ සහ ඉන් පිටත සිදුකරන ප්රකාශ හේතුවෙන් නීති වෘත්තිය තුළ බියක් සහ සැකයක් නිර්මාණය වී ඇති බව ඔහු සඳහන් කළේය. වත්මන් රජය රාජ්යය බිඳදැමීමට උත්සාහ කරන බවට චෝදනා කළ ඒ මහතා, වෛද්යවරුන් සම්බන්ධයෙන් සෞඛ්ය අමාත්යවරයා කළ තර්ජනාත්මක ප්රකාශය රාජ්ය සේවය කඩා වැට්ටවීමේ එක් පියවරක් ලෙස පෙන්වා දුන්නේය.
රාජ්යය සහ පුරවැසියා ආරක්ෂා කර ගැනීම සඳහා සියලු විපක්ෂ බලවේග තම අනන්යතාව රැකගනිමින් පොදු අරමුණක් වෙනුවෙන් එක්විය යුතු බව ඔහු මෙහිදී අවධාරණය කළේය. 2022 ජනතා නැගිටීම් හමුවේ සිය ආණ්ඩුව පසුබසිනු ලැබුවේ බංග්ලාදේශයේ හෝ නේපාලයේ මෙන් දහස් ගණනකගේ ජීවිත විනාශ වීමට ඉඩ නොතබා පුරවැසියා ආරක්ෂා කිරීමට බවත්, තම පක්ෂය සැමවිටම රාජ්යය ආරක්ෂා කිරීමට පෙනී සිටි බවත් ඔහු වැඩිදුරටත් පැවසීය. එමෙන්ම ධීවර ගැටලු සම්බන්ධයෙන් ජනාධිපතිවරයාගේ මැදිහත්වීම ප්රායෝගිකව ක්රියාත්මක නොවන බව ද නාමල් රාජපක්ෂ මහතා මෙහිදී විවේචනය කළේය.
