අමෙරිකාවේ ටෙක්සාස් ප්රාන්තයේ ඩලස් (Dallas) සහ ඔහායෝ ප්රාන්තයේ ක්ලීව්ලන්ඩ් (Cleveland) ඇතුළු ප්රදේශ කිහිපයක රාත්රී අහසේ අභිරහස් දීප්තිමත් වස්තුවක් ඇදී යන අයුරු දැක්වෙන වීඩියෝ දර්ශන පෙළක් සමාජ මාධ්ය ඔස්සේ දැඩි කතාබහට ලක්ව තිබේ. මෙය පොළොවට පතිත වීමට පෙර අහසේදී පිපිරී ගිය ප්රබල උල්කාපාතයක් බව නාසා ආයතනය මේ වන විට තහවුරු කර ඇත.
ක්ලීව්ලන්ඩ් සහ ඒ අවට ප්රදේශවාසීන් ප්රබල පිපිරුම් හඬක් (Sonic Boom) ඇසුණු බවත්, ඉන් නිවාස පවා සෙලවුණු බවත් වාර්තා කර ඇති අතර නාසා ආයතනය පවසන්නේ මෙය අඩි 6ක පමණ විෂ්කම්භයකින් යුත්, ටොන් 7ක් බරැති කුඩා ග්රහකයක් (Small Asteroid) වායුගෝලයට ඇතුළු වීමේදී සිදුවූවක් බවයි
පැයට සැතපුම් 45,000ක පමණ අධික වේගයකින් පෘථිවි වායුගෝලයට ඇතුළු වූ මෙම උල්කාපාතය, ටී.එන්.ටී. (TNT) පුපුරණ ද්රව්ය ටොන් 250ක ශක්තියකට සමාන බලයක් මුදාහරිමින් අහසේදී කැබලිවලට කැඩී ගොස් තිබේ
ටෙක්සාස් ප්රාන්තයේ ඩලස් වැසියන් ද අහස හරහා දීප්තිමත් ගිනි බෝලයක් ඇදී යන අයුරු දැක ඇති අතර, එහි වීඩියෝ දර්ශන මේ වන විට ජාත්යන්තර මාධ්ය ඔස්සේ ප්රචාරය වෙමින් පවතී
මෙම උල්කාපාතයේ කොටස් (Meteorites) ඔහායෝ ප්රාන්තයේ මෙඩිනා (Medina) ප්රදේශයට පතිත වන්නට ඇතැයි නාසා ආයතනය සැක කරන අතර, ඒ පිළිබඳ වැඩිදුර ගවේෂණ කටයුතු මේ වන විටත් ක්රියාත්මක වේ.
මෙවැනි විශාල උල්කාපාත දහවල් කාලයේ පවා දර්ශනය වීම ඉතා දුර්ලභ ගණයේ සිදුවීමක් බවත්, ඉන් මහජනතාවට හෝ දේපළවලට මෙතෙක් සෘජු හානියක් වාර්තා වී නොමැති බවත් විද්යාඥයෝ පෙන්වා දෙති.
