පාර්ලිමේන්තුවේ සියලු පක්ෂ නියෝජනය කරමින් අභිනවයෙන් ස්ථාපිත කරන ‘ජාතික සභාව’ , පාර්ලිමේන්තු ක්‍රමයේ කොටසක් බවට පත් කිරීමට හැකියාව ලැබෙන බව, අග්‍රාමාත්‍ය දිනේෂ් ගුණවර්ධන මහතා පවසයි.
අග්‍රාමාත්‍යවරයා අද (20) දින පාර්ලිමේන්තුවේදී පැවසුවේ මෙම සභාවේදී සියලු තීරණ ඒකමතිකව ගැනීමට පක්ෂ නායකයන් එකඟ වී ඇති බවයි.
එහිදී අග්‍රාමාත්‍යවරයා මෙසේ ‘ජාතික සභාවේ’ අධිකාර බලය සහ පොදු වගකීම් පැහැදිලි කළේය.
කෙටි, මධ්‍යම, සහ දීර්ඝ කාලීන ජාතික ප්‍රතිපත්ති සම්පාදනය කිරීම සඳහා මඟ පෙන්වීමට අදාළව පාර්ලිමේන්තුවේ පොදු ප්‍රමුඛතා නියම කිරීම, ඉන් එකකි. ආර්ථික ස්ථායීකරණයට අදාළ කෙටි සම්බන්ධයෙන් එකඟතාවය ඇති කිරීම සහ මධ්‍යම කාලීන පොදු අවම වැඩසටහන් සම්බන්ධයෙන් එකඟතාව ඇතිකර ගැනීම, තවත් වගකීමකි. අමාත්‍ය මණ්ඩලයේ අමාත්‍යවරයන්, ජාතික සභාව, විශේෂ කාරක සභාවල සභාපතිවරයන් සහ යොවුන් සංවිධානවල යොවුන් නිරික්ෂකයන් සහභාගී වන විශේෂ රැස්වීම් වෙනුවෙන් කටයුතු සංවිධානය කිරීමද මීට පැවරේ. ආංශික අධීක්ෂණ කාරක සභා, රජයේ මුදල් පිළිබඳ කාරක සභාව, රජයේ ගිණුම් පිළිබඳ කාරක සභාව, පොදු ව්‍යාපාර පිළිබඳ කාරක සභාව සහ රජයේ මුදල් පාලනය සිදු කරන කවර හෝ කාරක සභාවක් වෙතින් වාර්තා කැදවීමේ බලයද ‘ ජාතික සභාව’ට හිමිවේ. මෙහි ප්‍රධානත්වය කථානායකතුමාට හිමිවන අතර අග්‍රාමාත්‍යතුමා, පාර්ලිමේන්තුවේ සභානායකවරයා, විරුද්ධ පාර්ශවයේ නායකවරයා, ආණ්ඩු පාර්ශවයේ ප්‍රධාන සංවිධායකවරයා මෙන්ම දේශපාලන පක්ෂවල නායකයන් විසින් තීරණය කරන ලද පරිදි ශ්‍රී ලංකාවේ පිළිගත් දේශපාලන පක්ෂ වලින් නව වැනි පාර්ලිමේන්තුව නියෝජනය කරන පාර්ලිමේන්තු මන්ත්‍රීවරයන් තිස්පහකට (35) නොවැඩි සංඛ්‍යාවක් මෙහි සාමාජිකයෝ වෙති.
අග්‍රාමාත්‍ය දිනේෂ් ගුණවර්ධන මහතා මෙසේද කීය.
“ගරු නියෝජ්‍ය කථානායකතුමනි, ” අද දින පාර්ලිමේන්තුව හමුවට ජාතික සභාවක් ස්ථාපනය කිරීම සඳහා යෝජනාව ඉදිරිපත් කරනු ලබන්නේ පාර්ලිමේන්තුවේ සියලු පිළිගත්ත දේශපාලන පක්ෂ සහ නායකයන් විසින් සාකච්ඡා කිරීමෙන් අනතුරුව ඇති කරගත්ත එකඟතාවය මතයි. ජනාධිපතිතුමා විසින් පාර්ලිමේන්තුව අමතන ලද කතාවේද මේ බව සඳහන් කරනු ලැබුවා. ඒ අනුව ඉදිරියට යමින් එම සාකච්ඡාව ඵලදායීතත්ත්වයට ගෙන ඒම සඳහා මේ ජාතික සභාවේ කර්තව්‍ය සාර්ථක කර ගැනීමට සියලු දේශපාලන නායකයන්ගේ එකඟතාවය ලබා ගෙන තිබෙනවා. ඒ අනුව අපි විශ්වාස කරනවා අපේ රටේ කෙටි, මධ්‍යම, දීර්ඝ කාලීන ජාතික ප්‍රතිපත්තිය සම්පාදනය කිරීම සඳහා මඟ පෙන්වීමට අදාළව පාර්ලිමේන්තුවේ පොදු ප්‍රමුඛතාවය නියම කර ගැනීමටද, අප රට මුහුණ දෙන ආර්ථික සවිකරණයට අදාළ කෙටි හා මධ්‍යකාලීන පොදු අවම වැඩ සටහන් සම්බන්ධයෙන් එකඟතාවයන් ඇති කර ගැනීමටද, ඒ වගේම ඒ අනුවඅමාත්‍ය මණ්ඩලයේ අමාත්‍යවරයා ජාතික සභා විශේෂ කාරක සභාවල සභාපතිවරුන් හා යොවුන් සංවිධානවල නිරීක්ෂකයන්ද කැඳවා විශේෂ රැස්වීම් පැවැත්වීමටද සුවිශේෂ අවස්ථාවකට මේ ජාතික සභාව පරිවර්තනය වීමට හැකියාව තිබෙනවා. ඒ සමඟම ආංශික අධීක්ෂණ කාරක සභාවව, රජයේ මුදල් පිළිබඳ කාරක සභාව, රජයේ ගිණුම් පිළිබඳ කාරක සභාව, පොදු ව්‍යාපාර පිළිබඳ කාරක සභාව, අලුතෙන් ඇතිවන බැංකු කටයුතු මූල්‍ය සේවා පිළිබඳ කාරක සභාව , ක්‍රම හා විධි පිළිබඳ කාරක සභාව, ආර්ථික සවිකරණය පිළිබඳ කාරක සභාව හා රජයේ මුදල් පාලනය සිදු කරන කවර හෝ කාරක සභාවක් කැඳවීමට ද සාකච්ඡා කරවා එකඟතාවයන්ට පැමිණීමට ද ජාතික සභාවට හැකියාව ඇතිවෙනවා. ඒ අනුව නව පරිච්ඡේදයක් පාර්ලිමේන්තුවේ ඇති කර ගැනීමට පුළුවන් වී තිබෙනවා. සියලු දේශපාලන පක්ෂ හා නායකයන් ජනාධිපතිතුමා සමඟ රජයට මේ පිළිබඳව දක්වන ලද විවිධ සාකච්ඡාවලදී එකඟතාවයන්, යෝජනාවන් මේ ලෙස තව ඉදිරි පියවරක් ලෙස අපට ගමන් කරන්න පුළුවන් බව ඇති වෙනවා. විශේෂයෙන් මෙම කාරක සභාව මෑත කාලයේ ජාතික වූ බරපතලම අභියෝගය වන ආර්ථික අර්බුදය, මූල්‍යමය අර්බුදය, ණය ගෙවීමේ අර්බුදය හා පොදු ජනතාවට බලපාන ජන ජීවිතයන් සුරක්ෂිත කර සහාය වීම සඳහා වූ ප්‍රතිපත්ති ක්‍රියාමාර්ගවලටද සාකච්ඡා කොට මඟ පෙන්වීමට හැකියාව ඇති වෙයි කියලා අපි විශ්වාස කරනවා. අපේ එකඟතාවයක් ඇති වෙලා තිබෙනවා මේ පිළිබඳ මන්ත්‍රීවරු 37ක්. තව තිදෙනෙක් පිළිගත් දේශපාලන පක්ෂවලින් ද අන්තර්ගත වෙනවා. ඒ වගේම, ගරු නියෝජ්‍ය කථානායකතුමනි, ජාතික සභාව ඇති කිරීමේ යෝජනාව මා කියන්න ඕනේ බොහොම නිහතමානීවම ප්‍රති පක්ෂයෙන් ඉදිරිපත් වෙච්චි යෝජනාවක්. මේ පිළිබඳ මාර්තු මාසයේ තුන්වෙනි සතියේ එවකට ජනාධිපතිතුමා සමඟද සාකච්ඡා වාරයක් දේශපාලන පක්ෂ නායකයන් පැවැත්වුවා. ඒ සමඟම වර්ධනය වෙමින් සාකච්ඡාව ඵලදායී බවට පරිවර්තනය කර ගන්නට හැකියාව මත පාර්ලිමේන්තුව මේ පිළිබඳ විශේෂ යෝජනා සම්මතකින් කාරක සභා ඇති කර ගැනීමට අවශ්‍ය වන නිසා මෙම ජාතික සභාව තුළ අපි තුන් වාරයක් මෙය සාර්ථක කර ගැනීම සඳහා සාකච්ඡාවල් පැවැත්වුවා. සියලුම දේශපාලන පක්ෂ මේ ජාතික සභාව ඇති කර ගැනීමේ වුවමනාව සඳහා ඒ සාකච්ඡාවල්වලට පැමිණියා. එමඟින් සර්ව පාක්ෂික එකඟතාවයක් ඇති කර ගැනීමට පුළුවන්කමට අපට පිවිසෙන්නට හැකියාව තිබෙනවා. රජය හැටියට පාර්ලිමේන්තුව හමුවේ අගමැතිතුමා හැටියට මම ප්‍රකාශ කරන්ට ඕනේ, මෙම ජාතික සභාව ඉදිරියට ගෙන යාම සඳහා අපි ඇති කර ගත්තා වූ එකඟතාවයන් මත කටයුතු කිරීමට අපි සක්‍රීයව හවුල්කාරීත්වය දක්වන්නේ ගරු කථනායකතුමාගේ සභාපතිත්වයෙන් මේ කාරක සභාව පිහිටවීමෙන් තවදුරටත් එය ශක්තිමත්, පාර්ලිමේන්තු ක්‍රියාවලියේ කොටසක් බවටද පරිවර්තනය කරගන්න පුළුවන් වෙනවා. අපි මූණ දෙන අර්බුදයේ බරපතලකම යළි යළි මම පාර්ලිමේන්තුවේ ප්‍රකාශ කරන්නට අවශ්‍ය වන්නේ නෑ. යම්කිසි කාල පරිච්ඡය සති ගණනාවක් හරහා පාර්ලිමේන්තුව විසින් අතිමහත් බහුතර ඡන්දයෙන් තොරාගත් ජනාධිපතිතුමාට මෙන්ම, ජාත්‍යන්තරව රට මුහුණ දුන්නු යම් යම් බරපතල තත්ත්වයන් පිළිබඳ සාකච්ඡාවල් හමාර කර ගැනීමට පුළුවන්කමට පරිවර්තනය කරගන්න හැකි වුණා. ඒ පිළිබඳ විරුද්ධ පක්ෂයද සහභාගී වී සහයෝගය දුන් නියෝජිත මහත්වරුන්ට, මන්ත්‍රීවරුනට අපි ස්තූතිවන්ත වෙනවා. අපට මුහුණ දෙන්නේ අපි මුහුණ නොදුන්නු අර්බුදයකට හා අභියෝගයකට. එයින් ගොඩ ඒමේ ඕනෑකම සඳහා අපේ රටේ පාර්ලිමේන්තුව, නායකත්වය පමණක් නොව ජාතික නිෂ්පාදනය මෙහෙයවන අපේ රටේ කෘෂිකර්මාන්තයේ යෙදෙන ගොවි ජනතාවද, ධීවර හා කර්මාන්ත ක්ෂේත්‍රයන්හි යෙදෙන රාජ්‍ය හා පෞද්ගලික අංශයේ කර්මාන්තයන්ද ඒ වාගේම අපේ රටේ සුළු කාර්මිකයන් ඇතුළු අති මහත් බහුතරයගේ එකමුතුවෙන් ආර්ථික නිෂ්පාදනය වැඩි කරමින් විදේශ විනිමය වැඩියෙන් උපයා ගත හැකි අනාගතයකට රට පරිවර්තනය කරන්න එකඟතාවයෙන් වැඩ කළ හැකි වැඩපිළිවෙළවල් මෙම ජාතික සභාවේ ඇති කර ගන්න පුළුවන්කම ඇති වෙනවා. එකඟතාවයක් පැමිණියා, ජාතික සභාවේ කටයුතු ඒකමතිකව ගන්න තීරණ බවට පරිවර්තනය කරගෙන ඉදිරියට ගමන් කරන්න පුළුවන් වෙයි කියලා. මම මෙයට වඩා කාල වේලාව ගන්නේ නැහැ. ඉතාමත් වැදගත් කර්තව්‍යයකට ප්‍රමාද වන්න පුළුවන් සමහරු බලන කෝණයන්ගෙන්, නමුත් ස්ථාපිත ස්ථාවර වැඩ පිළිවෙළකට අපට අවතීරණ වන්න පුළුවන්කමක් ඇති වී තිබෙනවා. පාර්ලිමේන්තුව අමාත්‍ය මණ්ඩලයට හා කැබිනට් මණ්ඩලය වාගේම අදාළ නිලධාරීන් වෙනදාට වැඩි බලයක් මත, කැඳවා සාකච්ඡා කොට තීරණ නිර්දේශ කරගන්න පුළුවන් අවස්ථාව සුවිශේෂයි. 1931 සිට විධායක කාරක සභා ක්‍රමය ආරම්භ වී එලෙස ස්ථාපිත වූ සර්ව පාක්ෂික එකඟතාවයන් මත ඉදිරියට ගමන් කළ හැකි ලෙසට අපිට පරිවර්තනය වී කටයුතු කරන්න පුළුවන්කම තිබෙනවනම් ජනවරම හා ජනමතය සහභාගි ප්‍රජාතන්ත්‍රවාදයක් ඇතිකර ගැනීමේ අනාගතය සඳහා මේ අභියෝගය ජයගෙන පරිවර්තනයක් කරන්න පුළුවන් අරමුණු කරා මෙම ජාතික සභාව කටයුතු කරන්න බලාපොරොත්තු වන බව සඳහන් කරමින්, මෙය සර්ව පාක්ෂික එකඟතාවයක් ඇති කරගෙන තිබෙන නිසා මෙය සම්මත කර ගැනීම සිදුකරගෙන ඒ මත විවාදයන් ඉදිරියට ගෙන යාම සිදුවන්නේ නම් එය විශාල ආදර්ශයක් බවටද පත් වෙයි කියලා මම හිතනවා. නියෝජ්‍ය කථානායකතුමා සභාවේ ඉන්නවා. සර්ව පාක්ෂිකව, විපක්ෂය ඇතුළු සර්ව පාක්ෂික නායකයන්ට මේ අවස්ථාවේදී යෝජනා කරනවා, එසේ එකඟතාවයෙන් වැඩකරමු කියා.”යැයි අග්‍රාමාත්‍යවරයා වැඩිදුරටත් කියා සිටියේය.
