රජයේ අධ්යාපන පරිවර්තන ඉලක්ක සපුරා ගැනීම සඳහා නායකත්ව ගුණාංග සහිත ගුරුවරුන් බිහි කරන පරිසරයක් ජාතික අධ්යාපන විද්යාපීඨ තුළ ගොඩනැගිය යුතු බව අධ්යාපන, උසස් අධ්යාපන හා වෘත්තීය අධ්යාපන අමාත්ය, අගමැති ආචාර්ය හරිනි අමරසූරිය මහත්මිය ප්රකාශ කළාය. විද්යාපීඨයන්හි ප්රමිතිය නගාසිටුවීම සඳහා පත් කළ නව විද්වත් කමිටුව සමඟ පසුගියදා ඉසුරුපාය අධ්යාපන අමාත්යාංශයේදී පැවති සාකච්ඡාවකදී ඇය මේ බව අවධාරණය කළාය. පාසල් ප්රාථමික හා ද්විතීක අධ්යාපනයේ ගුණාත්මකභාවය සුරැකීමට විද්යාපීඨ මගින් ඉටුකරන මෙහෙවර අතිශය වැදගත් බව ද එහිදී පෙන්වා දෙන ලදී.
පේරාදෙණිය විශ්වවිද්යාලයේ මහාචාර්ය ලියනගේ අමරකීර්ති මහතාගේ සභාපතිත්වයෙන් යුත් මෙම කමිටුවට කොළඹ විශ්වවිද්යාලයේ ජ්යෙෂ්ඨ මහාචාර්ය අරෝෂා අදිකාරම්, යාපනය විශ්වවිද්යාලයේ මහාචාර්ය පූබාලසුන්දරම් අයින්ගරන් සහ විශ්රාමික ජ්යෙඨ කථිකාචාර්ය පී.ඒ.ඩී. අනිල් යන මහත්ම මහත්මීන් ඇතුළත් වේ. රජයේ ජාතික ප්රතිපත්තිවලට අනුකූලව විද්යාපීඨයන්හි යටිතල පහසුකම්, සිසු සුබසාධනය, පාලන කටයුතු, ඉගෙනුම් පරිසරය සහ ඇගයීම් ක්රමවේදයන් විධිමත් කිරීම සඳහා අවශ්ය නිර්දේශ ඉදිරිපත් කිරීම මෙම කමිටුවට පැවරී ඇති ප්රධාන කාර්යයයි.
විද්යාපීඨවල පවතින තත්ත්වය පිළිබඳව නිවැරදි අවබෝධයක් ලබා ගැනීම සඳහා කමිටු සාමාජිකයින් විසින් දිවයිනේ සියලුම ජාතික අධ්යාපන විද්යාපීඨ නිරීක්ෂණය කළ යුතු බව අගමැතිනිය මෙහිදී උපදෙස් දුන්නාය. අනාගතයේදී ඉහළ පෙළේ ගුරුවරුන් බිහි කරන විශිෂ්ට ආයතන බවට මේවා පත් කිරීම සඳහා පුළුල් අධීක්ෂණ ක්රියාවලියක් අවශ්ය බව ඇය වැඩිදුරටත් සඳහන් කළාය. මෙම අවස්ථාවට අධ්යාපන අමාත්යාංශයේ ලේකම් නාලක කලුවැව මහතා ඇතුළු උසස් නිලධාරීහු පිරිසක් ද සහභාගී වූහ.
