මුදල් නෝට්ටු මුද්‍රණය කිරීම හේතුවෙන් සංචිත ඉහළ යාම 2021ට සාපේක්ෂව මෙම වසරේ ගෙවී ගිය කාලය තුළ 78.8%කින් පහළ ගොස් ඇතැයි මුදල් රාජ්‍ය අමාත්‍ය ආචාර්ය රංජිත් සියඹලාපිටිය මහතා පවසයි.
රාජ්‍ය අමාත්‍යවරයා මේ බව පැවසුවේ අද (30) පාර්ලිමේන්තුවේ දී 2022 වසර සඳහා වන ණය සීමා ඉහළ නංවා ගැනීමේ යෝජනාව ඉදිරිපත් කරමිනි.
රාජ්‍ය අමාත්‍යවරයා කියා සිටියේ නෝට්ටු මුද්‍රණය කරන්නේ උද්ධමනයේ බලපෑම නොමැති කාරණා සඳහා පමණක් බවයි.
2022 සංශෝධිත අයවැය මගින් බිලියන 3844 ලෙස දක්වා ඇති ණය ගැනීමේ සීමාව තවත් රුපියල් බිලියන 663කින් ඉහළ නංවමින් බිලියන 4507 දක්වා වැඩිකර ගැනීම සඳහා අවශ්‍ය අනුමැතිය ලබා ගැනීම අදාළ යෝජනාවේ අරමුණයි. මීට අමතරව භාණ්ඩාගාර බිල්පත් අනුදත් සීමාව බිලියන 4000 සිට 5000 දක්වා ඉහළ නංවා ගැනීම සඳහා ද මෙම යෝජනාව ඉදිරිපත් කෙරිණි.
අමාත්‍යවරයා සඳහන් කළේ මූල්‍යමය ශක්තිය කළමනාකරණය කිරීම සඳහා මෙම යෝජනා ඉදිරිපත් කළ බවයි. ආදායම සහ වියදම අතර පරතරය ඉහළ යාම පිළිබඳ සංඛ්‍යා ලේඛන අමාත්‍යවරයා මෙහිදී පාර්ලිමේන්තුවට ඉදිරිපත් කළේ ය.
2018 වසරේ දී බිලියන 761ක් වූ ආදායම් වියදම් පරතරය 2019 වසරේ දී බිලියන 1439 දක්වා ඉහළ ගියේ ය. 2020 වසරේ දී රුපියල් බිලියන 1668ක් ලෙස දැක් වූ ආදායම් වියදම් අතර පරතරය 2021 වසරේ දී දැක් වුණේ රුපියල් බිලියන 2058ක් ලෙසිනි. 2022 වසරේ දී ඇස්තමේන්තු ගත පරතරය රුපියල් බිලියන 2333ක් ලෙස ගණන් බලා තිබේ.
ගෙවීමට තිබූ බිල්පත්වල වටිනාකමෙන් 42%ක් මේ වන විට ගෙවා අවසන් කර ඇත. රුපියල් බිලියන 359ක් ලෙස සටහන් වූ සමස්ත බිල්වල වටිනාකම මේ වන විට බිලියන 205 දක්වා අඩු කර ගැනීමට රජය සමත්ව ඇති බවයි අමාත්‍යවරයා කියා සිටියේ. රට පවතින අර්බුදකාරී තත්ත්වය හමුවේ ණය සීමාව ඉහළ නංවා ගැනීමෙන් තොරව මෙම ගැටලුව විසඳම් ලබා ගත හැකි ක්‍රමයක් කිසියම් පාර්ශ්වයක් ඉදිරිපත් කරන්නේ නම් ඊට අවස්ථාව ඇති බවයි වැඩි දුරටත් අමාත්‍යවරයා කියා සිටියේ.
