පෙබරවාරි 03 දා රටපුරා ජිවනෝපාය ව්‍යාපෘති ලක්ෂයක් උත්සවාකාරයෙන් ආරම්භ කරන අතර ඉතිහාසයේ පළමු වතාවට මහ දැවැන්ත මුදල් සම්භාරයක් ගමට ලබා දෙන වැඩපිළිවෙළක් ද සකස් කර ඇති බව පාර්ලිමේන්තු මන්ත්‍රි එස්.බී.දිසානායක මහතා පවසයි.
ඒ මහතා මේ බව ප්‍රකාශ කළේ ශ්‍රි ලංකා පොදුජන පෙරමුණ පක්ෂ මූලස්ථානයේ ඊයේ (01) පැවති ප්‍රවෘත්ති සාකච්ඡාවට එක්වෙමිනි.
එහිදි පාර්ලිමේන්තු මන්ත්‍රි එස්.බී.දිසානායක මහතා අදහස් දක්වමින්, “ මේ කොවිඩ් අර්බුදය ඇතිවෙලා පළවෙනි වටයේ මුළු ලෝකයේම පළවෙනි තැන හිටියේ අපියි චිනයයි. අපි ඒක 100% ම පාලනය කරගත්තා. දෙවෙනි වටය එනකොට විපක්ෂය, ජනතා විමුක්ති පෙරමුණ, පෙරටුගාමින්, ඇතැම් වෘත්තිය සමිතින් විශාල වශයෙන් පිරිස් මහ පාරට කැඳවලා අලුත් කොවිඩ් රැලි ගණනවාක් ලංකාවේ ආරම්භ කළ නිසා අපිට එය පාලනය කරගන්න බැරි වුණා. හැබැයි ඒ වෙනකොට ලෝක සෞඛ්‍ය සංවිධානය කිව්වේ මේ කොවිඩ් පාලනයට පිළිතුර තමයි මේ එන්නත්කරණයයි කියලා. ඒ නිසා ඉතාම අමාරුකම් මැද්දේ, ඉතාම ආර්ථික දුෂ්කරතා මැද්දේ ඉතාම බරපතල විදේශ විනිමය ප්‍රශ්න මැද්දේ ශ්‍රි ලංකා රජයත්, ජනාධිපතිතුමාත් එන්නත ප්‍රමුඛත්වය තියලා මේ එන්නත ජනතාවට ලබා දුන්නා. අපි ලෝකයේ පළවෙනි 06 අතරට මේ කොවිඩ් එන්නත නිසා ලංකාව ජයග්‍රාහි ලෙස ඉන්නවා. ලොකයේ දුප්පත් රටවල් 52 ක් තවමත් 6% ට එන්නත ලබා ගන්න බැරිව සිටිනවා. නමුත් බලවත් රටවල් බොහෝ දෙනෙක් මේ එන්නත්කරණය අතින් අපිට වඩා පහළින් ඉන්නේ. අද එන්නත්කරණ වැඩපිළිවෙලේ සාර්ථකත්වය නිසා අද සංචාරකයන්ගේ පැමිණීම වේගයෙන් වැඩිවෙලා තිබෙනවා. ඒ නිසා අපි පැත්තෙන් විශාල ජයග්‍රහණයක් ලබලා තිබෙනවා.
මේ 03 දා අපි රටපුරා ජිවනෝපාය ව්‍යාපෘති ලක්ෂයක් උත්සවාකාරයෙන් අපි විවෘත කරන්නයි සූදානම් වෙන්නේ. ඊට අවශ්‍ය ප්‍රතිපාදන මුදල් අමාත්‍යාංශයෙන් අපිට මේ වන විට ප්‍රදේශවලට ලැබිලා තිබෙනවා. මේ ජිවනෝපාය වැඩසටහන යටතේ ජාතික කෘෂි ආර්ථිකය ශක්තිමත් කරන්න වැඩ කරනවා වගේම ඒ සඳහා අවශ්‍ය මුදල් ප්‍රතිපාදන මේ වන විට ගම්වලට ලබාදී තිබෙනවා. දෙවැනි කාර්යය තමයි ඉතා කුඩා ක්ෂූද්‍ර ව්‍යවසායකයන් ශක්තිමත් කිරීමේ වැඩසටහනක් මේ ජිවනෝපාය වැඩසටහන යටතේ අපි ඉතාම වේගයෙන්, ඉතාම ශක්තිමත්ව කරගෙන යනවා. හැබැයි අපි ඉතාම ආර්ථික අමාරුකම් මැද්දේ තමයි මේ සියලු කටයුතු කරගෙන යන්නේ.
අද විපක්ෂය කට ඇරගෙන බලාගෙන ඉන්නවා ආණ්ඩුව බංකොලොත් කියලා ප්‍රකාශයට පත් කරනකන්. 1971 ජනතා විමුක්ති පෙරමුණේ ප්‍රහාරයෙන් පස්සේ රටේ ආර්ථිකය දශම 2 ට ගියා. 72, 78 මහා ආර්ථික අවපාතයක් ඇති වුණා. ඉතාම අමාරු කාලයක් පැමිණියා. හැබැයි 1975, 76 කාලයේ අපි ගොඩ ආවා. 2009 යුද්ධය දිනලා රට එක්සේසත් කරනකොට අපි ආර්ථික වශයෙන් අපි බිංදුවට වැටිලා තිබුණේ. ආර්ථික සංවර්ධන වේගය 3.4 යි. හැබැයි 2009 සහ 2015 තමයි මේ ලංකා ඉතිහාසයේ ආර්ථික වර්ධනය ස්වර්ණතම කාල පරිච්ඡේදය වන්නේ. දකුණු ආසියාවේ වේගයෙන් සංවර්ධනය වන රට බවට පත් වුණා. ශ්‍රි ලංකාවේ ඒ ආර්ථික ජවය ගත්ත, එසේ කරපු මිනිස්සු තමයි අදත් මේ ආණ්ඩුව කරන්නේ. අපි මේ ප්‍රශ්නවලින් ගොඩ එනවා. කවුරුත් මේ රට වැටෙනවා කිව්වට අපි මෙවායින් ගොඩ එනවා. දැන් සංචාරක ව්‍යාපාරය වේගයෙන් නැගිටිනවා. ඒ වගේම අපිට හොඳ අවස්ථාවක් තිබෙනවා වරයා නගරය හරහා අපේ ආර්ථිකය ජව සම්පන්න පිම්මක් ගන්න බලාපොරොත්තු වෙනවා. යැයි පාර්ලිමේන්තු මන්ත්‍රි එස්.බී.දිසානායක මහතා වැඩිදුරටත් කියා සිටියේය.
