පාකිස්ථාන ගුවන් හමුදාව විසින් ඇෆ්ගනිස්ථානයේ කාබුල් අගනුවර සහ නන්ගර්හාර් පළාතේ ජනාවාස ඉලක්ක කර එල්ල කරන ලද බෝම්බ ප්රහාරවලින් පුද්ගලයන් හය දෙනෙකු ජීවිතක්ෂයට පත්ව ඇති බව තලේබාන් පාලනය නිවේදනය කරයි. මියගිය පිරිස අතර කුඩා දරුවන් ද සිටින අතර, ප්රහාරවලින් තවත් පුද්ගලයන් 12 දෙනෙකුට වැඩි පිරිසක් තුවාල ලබා තිබේ. අසල්වැසි රටවල් දෙක අතර මෑත වසරවල පැවති දරුණුතම ගැටුම්කාරී තත්ත්වය මෙය වන අතර, චීනය මැදිහත් වී සාමය ඇති කිරීමට උත්සාහ කරමින් සිටින පසුබිමක මෙම ප්රහාර එල්ල වීම විශේෂත්වයකි.
කන්දහාර් ගුවන් තොටුපළ අසල පිහිටි ‘Kam Air’ පෞද්ගලික ගුවන් සමාගමට අයත් ඉන්ධන ගබඩාවකට ද පාකිස්ථානය ප්රහාර එල්ල කර ඇති බව තලේබාන් ප්රකාශක සබිහිල්ලා මුජාහිඩ් තහවුරු කළේය. සිවිල් ගුවන් යානා සහ එක්සත් ජාතීන්ගේ සංවිධානයේ සහන සේවා යානා සඳහා ඉන්ධන සපයන මෙම මධ්යස්ථානය ඉලක්ක කිරීම හුදු ප්රකෝප කිරීමක් බවත්, මෙවැනි ආක්රමණශීලී ක්රියාවන් නිහඬව විඳදරා නොගන්නා බවත් ඔහු වැඩිදුරටත් සඳහන් කළේය. ප්රහාරයට ලක්වූ ප්රදේශවල ජනතාව පවසන්නේ මහත් ශබ්දයක් සමඟ නිවාසවල බිත්ති සහ ජනෙල් බිඳී ගිය බවත්, දූවිල්ලෙන් මුළු ප්රදේශයම වැසී ගිය බවත්ය.
මැදපෙරදිග කලාපයේ ඇමරිකා-ඉරාන යුදමය වාතාවරණය හේතුවෙන් පවතින අස්ථාවරත්වය මධ්යයේ, ඇෆ්ගනිස්ථානය සහ පාකිස්ථානය අතර ඇතිවී තිබෙන මෙම නව ගැටුම කලාපීය ආරක්ෂාව තවදුරටත් අවදානමකට ලක් කර ඇත. ජනාවාස ඉලක්ක කර එල්ල වූ මෙම බෝම්බ ප්රහාර හේතුවෙන් දේපළවලට ද දැඩි හානි සිදුව ඇති අතර, පවතින තත්ත්වය හමුවේ දේශසීමා ආශ්රිතව දැඩි නොසන්සුන්තාවක් වර්ධනය වෙමින් පවතී.
