පසුගිය ජනාධිපතිවරණයේදී මෙරට ජනතාව ලබාදුන් ඓතිහාසික ජනවරම සහ නව දේශපාලන සංස්කෘතියක් පිළිබඳ අපේක්ෂාවන් වත්මන් රජයේ ඇතැම් ඉහළ නිලධාරීන්ගේ ක්රියාකලාපය හේතුවෙන් බිඳවැටීමේ අවදානමකට ලක්ව තිබේ. විශේෂයෙන්ම පොල් කර්මාන්තයට අදාළ ප්රධාන රාජ්ය ආයතනයක ඉහළ තනතුරක් හොබවන පුද්ගලයකුගේ අදූරදර්ශී තීරණ හා පෞද්ගලික ලාභාපේක්ෂාවන් මත පදනම් වූ ක්රියාමාර්ග හේතුවෙන් සමස්ත පොල් නිෂ්පාදන ක්ෂේත්රයම මේ වන විට දැඩි අර්බුදයකට මුහුණ දී සිටින බව වාර්තා වේ. තමා අසාර්ථක වූ පෞද්ගලික ව්යාපාර ගොඩනැගීම සඳහා රජයේ තනතුර හා බලතල අවභාවිත කරන බවට අදාළ නිලධාරියාට එරෙහිව බරපතළ චෝදනා එල්ල වෙමින් පවතී.
වාර්තා වන අන්දමට, විෂයභාර අමාත්යවරයා සමඟ පවතින සමීප සබඳතා උපයෝගී කරගනිමින් මෙම තනතුර ලබාගෙන ඇති මොහු, සිය බලතල භාවිත කරමින් සමුපකාර අංශයට අයත් ව්යාපාර ද තමා යටතට ගැනීමට කටයුතු කරමින් සිටී. මීට අමතරව පොල් ආශ්රිත නිෂ්පාදන සඳහා වන විශේෂ බලපත්ර ද ලබාගනිමින් ස්වකීය ව්යාපාරික ජාලය ශක්තිමත් කරගැනීමට මොහු උත්සාහ දරන බව ක්ෂේත්රයේ ප්රසිද්ධ රහසක් වී ඇත. මෙවැනි හිතුවක්කාරී තීරණ හේතුවෙන් සාමාන්ය ජනතාවට අධික මිලකට පොල් නිෂ්පාදන මිලදී ගැනීමට සිදුව ඇති අතර, එය වත්මන් රජය කෙරෙහි පවතින ජනතා විශ්වාසය පළුදු කිරීමට ද හේතුවක් වී තිබේ.
මෙම නිලධාරියාගේ ක්රියාකලාපය පිළිබඳ පැමිණිලි ජනාධිපතිවරයා වෙත යොමු වීම වළක්වාලීමට කිසියම් අදිසි හස්තයක් ක්රියාත්මක වන බවට ද සැකයක් පවතී. කෙසේ වෙතත්, අදාළ රාජ්ය ආයතනයේ නිලධාරීන් සහ පොල් කර්මාන්තයේ නියැලී සිටින ව්යාපාරික ප්රජාව අනතුරු අඟවන්නේ මෙම අදූරදර්ශී පාලනය තවදුරටත් ඉදිරියට ගියහොත් ඉදිරි මාස කිහිපය තුළ මෙරට පොල් නිෂ්පාදන ක්ෂේත්රය සම්පූර්ණයෙන්ම කඩා වැටීමට ඉඩ ඇති බවයි. රජයේ ප්රතිපත්තිවලට පටහැනිව ක්රියා කරන මෙවැනි නිලධාරීන් සම්බන්ධයෙන් වහාම විධිමත් පරීක්ෂණයක් පවත්වා ක්ෂේත්රය ආරක්ෂා කර ගැනීම බලධාරීන් සතු වගකීමකි.
උපුටා ගැනීම: විශේෂ ලියුම්කරුවෙකු විසිනි
