පාස්කු ඉරිදා බෝම්බ ප්රහාරය සම්බන්ධයෙන් විමර්ශනය කරන අපරාධ පරීක්ෂණ දෙපාර්තමේන්තුව විසින් බුද්ධි අංශ ප්රධානී සුරේෂ් සලෙයි අත්අඩංගුවට ගැනීමත් සමඟ සමාජය තුළ ඇතිව තිබෙන කතාබහ පිළිබඳව කතෝලික ගිහි සභාව අද (05) විශේෂ මාධ්ය හමුවක් පවත්වමින් සිය ස්ථාවරය ප්රකාශ කළේය. මෙහිදී අදහස් දැක්වූ තිලින අලහකෝන් මහතා අවධාරණය කළේ සුරේෂ් සලෙයි අත්අඩංගුවට ගැනීම “දෙබරයට ගල් ගැසීමක්” බඳු ක්රියාවක් වී ඇති බවයි. සලෙයි අත්අඩංගුවට ගැනීම වැරදි බව පවසන පිරිස් වෙත ප්රශ්නයක් යොමු කරමින් ඔහු කියා සිටියේ, එදා සරත් ෆොන්සේකා මහතා අත්අඩංගුවට ගත් අවස්ථාවේදී මෙම “රණවිරු ගාය” කොහේද තිබුණේ ද යන්නයි.
ප්රහාරය සම්බන්ධයෙන් හිටපු පොලිස්පති දේශබන්දු තෙන්නකෝන් බෝම්බ ලොරියක් මුදා හැරීම, නිලන්ත ජයවර්ධන විසින් දත්ත මකා දැමීම සහ සුරේෂ් සලෙයි විසින් අන්තවාදීන්ට අල්ලස් ලබා දීම වැනි කරුණු පාස්කු කොමිෂන් වාර්තාවල පැහැදිලිව සඳහන්ව ඇති බව මෙහිදී අනාවරණය විය. එසේම, වත්මන් රජයේ ආරක්ෂක නියෝජ්ය අමාත්යවරයා එකල නැගෙනහිර ආඥාපතිවරයා ලෙස කටයුතු කළ බැවින්, පාස්කු නඩුව අවසන් වන තෙක් ඔහුගේ අමාත්ය ධුරය තාවකාලිකව අත්හිටුවන (Hold) ලෙස ද ගිහි සභාව රජයෙන් ඉල්ලා සිටියේය.
මාධ්යවේදී ලසන්ත වික්රමතුංග, එක්නැලිගොඩ, තාජුඩීන් සහ නිමලරාජන් වැනි ඝාතන හා පැහැරගැනීම්වලට ද සුරේෂ් සලෙයි සම්බන්ධ බවට චෝදනා එල්ල විය. බෝම්බ පිපිරෙන දිනවල සලෙයි වෙනත් අයෙකුගේ ගමන් බලපත්රයකින් ලංකාවට පැමිණ සිටි බවට හිටපු ආරක්ෂක ලේකම් හේමසිරි ප්රනාන්දු මහතා සාක්ෂි දීමට සූදානම් බව ද මෙහිදී අනාවරණය විය. දේශපාලන බලය භාවිත කරමින් පාස්කු යුක්තියට බාධා නොකරන ලෙසත්, අධිකරණ තීන්දුවට පෙර පුද්ගලයන් නිර්දෝෂී කිරීමට උත්සාහ නොකරන ලෙසත් ගිහි සභාව මෙහිදී අවධාරණය කළේය.
මෙම මාධ්ය හමුවේදී තවදුරටත් අදහස් දක්වමින් ඔවුන් කියා සිටියේ, අතීතයේදී “වඳ කොත්තු” සහ “නයි” පෙන්වමින් ජාතිවාදය ඇවිස්සූ පිරිස්ම අද සලෙයි වෙනුවෙන් පෙනී සිටින බවයි. ඉදිරියේදී සිදු කරන විධිමත් විමර්ශන හරහා ප්රහාරයට සෘජුව සහ වක්රව සම්බන්ධ වූ සියලුම දේශපාලනඥයන් සහ නිලධාරීන්ගේ රෙදි ගැලවෙනු ඇති බවත්, වෙඩි බෙහෙත් නූල පත්තු කළ අය කවුදැයි රටටම හෙළි වනු ඇති බවත් ගිහි සභාව විශ්වාසය පළ කළේය.
