අමෙරිකානු ආරක්ෂක ලේකම් පීට් හෙග්සෙත්ගේ (Pete Hegseth) සමීපතම ආධ්යාත්මික උපදේශකයා වන බෲක්ස් පොටීගර් (Brooks Potteiger) පියතුමා, ටෙක්සාස් ප්රාන්තයේ ඩිමොක්රටික් සෙනෙට් අපේක්ෂක ජේම්ස් ටැලරිකෝ (James Talarico) සම්බන්ධයෙන් සිදුකළ ප්රකාශයක් හේතුවෙන් ජාත්යන්තර මාධ්යවල දැඩි අවධානයට ලක්ව තිබේ. ‘Reformation Red Pill’ පෝඩ්කාස්ට් වැඩසටහනකදී එහි මෙහෙයවන්නා ජේම්ස් ටැලරිකෝ මියයා යුතු බව ප්රකාශ කළ අවස්ථාවේදී පොටීගර් පියතුමා එය අනුමත කරමින් ඔහු “ක්රිස්තුස් වහන්සේ සමඟ කුරුසියේ ඇණ ගැසිය යුතු” බව ප්රකාශ කිරීම මෙම මතභේදයට හේතු විය.
මෙම ප්රකාශය සම්බන්ධයෙන් විවේචන එල්ල වීමත් සමඟ නිවේදනයක් නිකුත් කළ පොටීගර් පියතුමා පවසා සිටියේ තමන් එමගින් අදහස් කළේ ටැලරිකෝගේ සැබෑ මරණය නොව, ඔහුගේ පැරණි පව්කාර ජීවිතය මියගොස් ඔහු ක්රිස්තු දහම වැළඳගත යුතු බව යන ආගමික අර්ථය බවයි. කෙසේ වෙතත් ජේම්ස් ටැලරිකෝ මේ පිළිබඳව ‘X’ පණිවුඩයක් නිකුත් කරමින් කියා සිටියේ යේසුස් වහන්සේ ආදරය කරන බවත් ක්රිස්තියානි ජාතිකවාදය මාරාන්තික බවත්ය. තමන්ගේ මරණය පැතුවද තමන් පියතුමාට ආදරය කරන බව ද ඔහු එහි වැඩිදුරටත් සඳහන් කළේය.
පොටීගර් පියතුමා ආරක්ෂක ලේකම් පීට් හෙග්සෙත්ගේ පෞද්ගලික මිතුරෙකු සහ මඟපෙන්වන්නෙකු වන අතර ඔහු පෙන්ටගනයේ (Pentagon) පවත්වන මාසික ක්රිස්තියානි යාච්ඤා මෙහෙයන් සඳහා ද නිතර සහභාගී වන්නෙකි. පෙන්ටගන මාධ්ය ප්රකාශක කිංස්ලි විල්සන් පවසා සිටියේ ඇතැම් මාධ්ය විසින් පියතුමාගේ වදන් වැරදි ලෙස අර්ථකථනය කරමින් හෙග්සෙත් ලේකම්වරයාට පහර දීමට උත්සාහ කරන බවයි. මෙම සිදුවීමත් සමඟ අමෙරිකානු දේශපාලනය තුළ ආගමික බලපෑම පිළිබඳව යළිත් දැඩි කතාබහක් නිර්මාණය වී තිබේ.
