පශ්චාත් සීමාවාසික වෛද්යවරුන්ට පත්වීම් ලබාදීමේදී රජය අනුගමනය කළ ක්රියාවලියට එරෙහිව ගොනු කර ඇති පෙත්සම් විභාගයට ගැනීමට අවසර දෙන්නේද නැද්ද යන්න සහ අදාළ ස්ථානගත කිරීමේ ලැයිස්තුව ක්රියාත්මක කිරීම වළක්වන අතුරු නියෝගයක් නිකුත් කරන්නේද යන්න පිළිබඳ තීන්දුව ලබන මැයි මස 08 වනදා ප්රකාශයට පත් කරන බව අභියාචනාධිකරණය අද (අප්රේල් 10) තීරණය කළේය. අභියාචනාධිකරණ සභාපති විනිසුරු රොහාන්ත අබේසූරිය සහ ප්රියන්ත ප්රනාන්දු යන මහත්වරුන්ගෙන් සමන්විත විනිසුරු මඩුල්ල හමුවේ මෙම පෙත්සම් කැඳවනු ලැබීය.
මෙහිදී වගඋත්තරකාර සෞඛ්ය අමාත්ය වෛද්ය නලින්ද ජයතිස්ස මහතා වෙනුවෙන් පෙනී සිටි සොලිසිටර් ජෙනරාල් විරාජ් දයාරත්න මහතා මූලික විරෝධතා මතු කරමින් කියා සිටියේ, රාජ්ය සේවා කොමිසම විසින් අනුමත කර ඇති මෙම පත්වීම් පිළිබඳ සලකා බැලීමට අභියාචනාධිකරණයට නීතිමය බලයක් නොමැති බවයි. එසේම මේවා ස්ථාන මාරු කිරීම් ලෙස සැලකිය නොහැකි බවත්, රජයේ වෛද්ය නිලධාරීන්ගේ සංගමය වැනි වෘත්තීය සමිතිවලට මෙයට මැදිහත් වීමට බලයක් නොමැති බවත් ඔහු පෙන්වා දුන්නේය. දැනටමත් පත්වීම් ලැබූවන්ගෙන් 75%ක් සේවයට වාර්තා කර ඇති බැවින් පෙත්සම් පවත්වාගෙන යා නොහැකි බව ඔහුගේ ස්ථාවරය විය.
කෙසේ වෙතත්, පෙත්සම්කාර පාර්ශවය වෙනුවෙන් පෙනී සිටි ජනාධිපති නීතිඥ අලි සබ්රි මහතා තර්ක කළේ, සීමාවාසික පුහුණුව අවසන් කළ පසු එම පිරිස වෛද්යවරුන් වන බැවින් මෙය පත්වීමක් නොව ස්ථාන මාරුවීමක් ලෙස සැලකිය යුතු බවයි. ආයතන සංග්රහයට අනුව දුෂ්කර සේවා ස්ථාන නිගමනය කිරීමේ බලය මාරු මණ්ඩල සතු බවත්, අමාත්යවරයා එම බලය අත්තනෝමතික ලෙස පවරා ගැනීම නීති විරෝධී බවත් ඔහු සඳහන් කළේය. රජයේ වෛද්ය නිලධාරීන්ගේ සංගමය වෙනුවෙන් පෙනී සිටි ජනාධිපති නීතිඥ සාලිය පීරිස් මහතා ද අවධාරණය කළේ මාරු මණ්ඩලයේ එකඟතාවයකින් තොරව සෞඛ්ය අමාත්යවරයා ගෙන ඇති මෙම තීරණය නීතියට පටහැනි බවයි. දෙපාර්ශවයේම කරුණු සලකා බැලූ අධිකරණය, ලිඛිත දේශන මේ මස 24 වනදාට පෙර ගොනු කරන ලෙස නියම කළේය.
