අතීතයේ දේශපාලන බලය තහවුරු කර ගැනීම සඳහා සංවිධානාත්මක අපරාධකරුවන් සහ මත්ද්රව්ය ජාවාරම්කරුවන්ගේ සෘජු සහාය ලබාගෙන ඇති බවට තොරතුරු අනාවරණය වී ඇතැයි මහජන ආරක්ෂක හා පාර්ලිමේන්තු කටයුතු අමාත්ය ආනන්ද විජේපාල මහතා පවසයි. මීරිගම පොලිස් ස්ථානයට මුල්ගල තැබීමේ උත්සවයකදී අදහස් දක්වමින් අමාත්යවරයා අවධාරණය කළේ, වර්තමානයේ පවතින පාතාල සහ මත්ද්රව්ය ව්යාප්තිය දේශපාලන අනුග්රහය මත ගොඩනැඟුණු ඉතිහාසයක ප්රතිඵලයක් බවයි. ඇතැම් දේශපාලන පක්ෂ සිය රැස්වීම් සංවිධානය කිරීමට පවා පාතාල සාමාජිකයන් සහ මත්ද්රව්ය සල්ලි උපයෝගී කරගෙන ඇති බවට කරුණු හෙළිව ඇති බවත්, වත්මන් රජය ක්රමයෙන් එම දේශපාලන සබඳතා ඉවත් කරමින් පොලීසිය හරහා අපරාධ මර්දනයට කටයුතු කරන බවත් ඔහු වැඩිදුරටත් සඳහන් කළේය.
සංවිධානාත්මක අපරාධකරුවන් පාලනය කිරීම සඳහා සකස් කරන ලද නව පනත් කෙටුම්පතක් ඉදිරි සතියේදී අමාත්ය මණ්ඩලයට ඉදිරිපත් කිරීමට නියමිත බව මෙහිදී අනාවරණය විය. අමාත්යවරයාට අනුව, අමාත්ය මණ්ඩල අනුමැතියෙන් පසු සති දෙකක් ඇතුළත එම පනත පාර්ලිමේන්තුවට ඉදිරිපත් කර සම්මත කර ගැනීමට සැලසුම් කර තිබේ. විදේශගතව සිටින පාතාල නායකයන් “රතු නිවේදන” (Red Notices) හරහා මෙරටට ගෙන්වා ගැනීමට කටයුතු කරමින් සිටින බවත්, අපරාධ තොරතුරු සපයන ඔත්තුකරුවන්ගේ ආරක්ෂාව තහවුරු කිරීමට උපරිම ක්රියාමාර්ග ගෙන ඇති බවත් අමාත්ය විජේපාල මහතා මෙහිදී මාධ්ය වෙත ප්රකාශ කළේය.
