දිට්වා සුළි කුණාටුවෙන් සිදු වූ දැඩි හානි හේතුවෙන් තාවකාලිකව අඩාල වී තිබූ පුත්තලම දුම්රිය මාර්ගයේ ගමනාගමන කටයුතු හෙට එනම් පෙබරවාරි 16 වනදා සිට පුත්තලම දුම්රිය ස්ථානය දක්වාම නැවත ආරම්භ කරන බව දුම්රිය දෙපාර්තමේන්තුව නිවේදනය කරයි. මෙම මාර්ගය මීට පෙර අදියර කිහිපයක් යටතේ මීගමුව, නාත්තන්ඩිය සහ හලාවත දක්වා විවෘත කර තිබූ අතර හෙට සිට කොළඹ කොටුව සහ පුත්තලම අතර සම්පූර්ණ දුර ප්රමාණයම මගී ජනතාව සඳහා විවෘත වනු ඇත. බත්තුළුඔය පාලම අසල මාර්ගය සෝදා යාම සහ තිල්ලඩිය ප්රදේශයේ පස් කඳු කඩා වැටීම වැනි බරපතල ආපදා තත්ත්වයන් සම්පූර්ණයෙන් යථා තත්ත්වයට පත් කිරීමෙන් පසුව මෙම තීරණය ගෙන තිබේ.
නව දුම්රිය කාලසටහනට අනුව කොළඹ කොටුවෙන් පස්වරු 12:30 ට සාමාන්ය දුම්රියක් ද, පස්වරු 04:10 ට සහ පස්වරු 05:25 ට කඩිනම් දුම්රියන් ද පුත්තලම බලා ධාවනය වීමට නියමිතය. එසේම පුත්තලම දුම්රිය ස්ථානයෙන් අලුයම 03:55 ට සහ අලුයම 04:30 ට කඩිනම් දුම්රියන් දෙකක් ද, පෙරවරු 08:30 ට සාමාන්ය දුම්රියක් ද කොළඹ කොටුව බලා පිටත් වීමට සැලසුම් කර ඇත. මෙම මාර්ගය විවෘත කිරීමත් සමඟ වයඹ දිග වෙරළබඩ තීරයේ මගී ජනතාවට සහ ව්යාපාරික ප්රජාවට පවතින ප්රවාහන අපහසුතා රැසක් මගහැරී යනු ඇතැයි අපේක්ෂා කෙරේ.
