වයඹ පළාත් සභාව යටතේ පාලනය වූ පුත්තලම මූලික රෝහල, එහි ගුණාත්මකභාවය ඉහළ නැංවීම සහ තෘතීයික සත්කාර මට්ටම දක්වා සංවර්ධනය කිරීමේ අරමුණින් සෞඛ්ය සහ ජනමාධ්ය අමාත්යාංශය යටතට පවරා ගැනීමට අද (04) අමාත්ය මණ්ඩල අනුමැතිය හිමි විය. ප්රාදේශීය ලේකම් කොට්ඨාස 09ක වෙසෙන මිලියන 4කට අධික ජනතාවකට සේවය සපයන මෙම රෝහල, 2019 වසරේදී ‘ඒ’ (Grade A) වර්ගයේ මූලික රෝහලක් ලෙස උසස් කළද, මෙතෙක් එම මට්ටමේ පහසුකම් පූර්ණ වශයෙන් ක්රියාත්මක නොවීම මෙම තීරණයට හේතු වී තිබේ.
පවතින ගැටලු සහ අවශ්යතාවය: අක්කර 13ක භූමි භාගයක පිහිටි මෙම රෝහල සතුව ඇඳන් 746ක් සහ ගොඩනැගිලි 52ක් පවතී. කෙසේ වුවද, රෝහලේ පිහිටීම අනුව තද වැසි කාලවලදී වාට්ටු ගංවතුරට ලක්වීම, බාහිර රෝගී අංශයේ සහ හදිසි ප්රතිකාර ඒකකයේ ඉඩකඩ ප්රමාණවත් නොවීම වැනි බරපතල යටිතල පහසුකම් ගැටලු රැසක් පවතින බව නිරීක්ෂණය වී ඇත. පළාත් සභාව සතු සීමිත ප්රතිපාදන මඟින් මෙම ගැටලු විසඳීම දුෂ්කර බැවින් රෝහල මධ්යම රජයට පවරා ගැනීමට තීරණය විය.
තෘතීයික සත්කාර මට්ටමට සංවර්ධනය කිරීම: වයඹ පළාත් ආණ්ඩුකාරවරයාගේ ද එකඟතාවය මත සිදු කෙරෙන මෙම පවරා ගැනීම හරහා, 2025 වසරේදී සකස් කළ ප්රධාන රෝහල් සංවර්ධන සැලැස්මට අනුව රෝහල නවීකරණය කිරීමට නියමිතය. මධ්යම රජයේ සෞඛ්ය අමාත්යාංශය යටතට පත්වීමත් සමඟ විශේෂඥ වෛද්ය සේවාවන් පුළුල් කිරීම, නවීන රෝග විනිශ්චය සේවා ස්ථාපිත කිරීම සහ ගංවතුර අවදානම පාලනය කිරීමට අවශ්ය ස්ථිර විසඳුම් ලබා දීමට රජය බලාපොරොත්තු වේ.
