අද ලෝකය විද්යාව හා තාක්ෂණය අතින් විශාල දියුණුවක් ලබා තිබුණද, පවතින විවිධ ගැටුම් සහ අර්බුද හමුවේ මිනිස් සමාජයට සාමය අත්යවශ්යම සාධකයක් වී ඇති බව දකුණු පළාත් ආණ්ඩුකාර ආචාර්ය සුසිරිපාල මානවඩු මහතා පවසයි. ඒ මහතා මේ බව ප්රකාශ කළේ ගාල්ල, රූමස්සල ජපන් සාම චෛත්යය සසුනට පූජා කර වසර 21ක් සපිරීම නිමිත්තෙන් එහි වාහල්කඩට මුල්ගල් තැබීමේ උත්සවයට පසුගියදා (27) සහභාගී වෙමිනි.
තමා ආණ්ඩුකාර ධුරයට පත්ව සහභාගී වන පළමු ආගමික උත්සවය මෙය බව සිහිපත් කළ ඒ මහතා, ශ්රී පාදස්ථානයේ ඉදි කළ මෙරට පළමු සාම චෛත්යයේ සිට වලපනේ, බණ්ඩාරවෙල සහ අම්පාර වැනි ප්රදේශ රැසක සාම චෛත්යයන් ඉදිකරමින් ලෝකයට සාමයේ පණිවුඩය රැගෙන යාම අතිශය අගය කළ යුතු උතුම් කාර්යයක් බව අවධාරණය කළේය. රූමස්සල සාම චෛත්යයේ වාහල්කඩ ඉදිකිරීම් කටයුතු කඩිනමින් සාර්ථක කර ගැනීමට අවශ්ය ආශීර්වාදය ද මෙහිදී ඒ මහතා ප්රාර්ථනා කළේය.
ජපන් මහායාන සම්ප්රදායට අනුව ජී. අසාම් ස්වාමීන් වහන්සේ ප්රමුඛ මහා සංඝරත්නය විසින් මෙම ආගමික වතාවත් මෙහෙයවනු ලැබූහ. මෙම අවස්ථාවට ථේරවාදී සහ මහායාන ස්වාමීන් වහන්සේලා, සර්ව ආගමික නායකයන් මෙන්ම නියෝජ්ය අමාත්ය රත්න ගමගේ, පාර්ලිමේන්තු මන්ත්රී වෛද්ය නිශාන්ත සමරවීර සහ ගාල්ල නගරාධිපති සුනිල් ගමගේ යන මහත්වරුන් ඇතුළු සම්භාවනීය පිරිසක් සහභාගී වී සිටියහ.
