ඉරානයට එල්ල වන ඇමරිකානු සහ ඊශ්රායල ප්රහාර සම්බන්ධයෙන් රුසියාව සහ චීනය සිය දැඩි විරෝධය පළ කර ඇත. ටෙහෙරානය න්යෂ්ටික බෝම්බ නිපදවන බවට මෙතෙක් කිසිදු සාක්ෂියක් නොමැති බව රුසියාව පවසන අතර, වහාම ක්රියාත්මක වන පරිදි මෙම ප්රහාර නතර කරන ලෙස චීනය බලකර සිටියි.
චීන විදේශ අමාත්ය වැන්ග් යී (Wang Yi) සිය ඊශ්රායල පාර්ශවකරු වන ගිඩියොන් සාර් (Gideon Saar) සමඟ දුරකථන සංවාදයක නිරත වෙමින් කියා සිටියේ, මෙම ප්රහාරය එල්ල වී ඇත්තේ වොෂින්ටනය සහ ටෙහෙරානය අතර සාකච්ඡා සාර්ථක මට්ටමක පවතින පසුබිමක බවයි. හමුදාමය ක්රියාමාර්ග මගින් ප්රශ්න විසඳිය නොහැකි බවත්, එය තවදුරටත් ගැටුම් උග්ර කරමින් දීර්ඝකාලීන බරපතල ප්රතිවිපාක ඇති කරන බවත් ඔහු අවධාරණය කළේය.
මේ අතර රුසියානු විදේශ අමාත්ය සර්ජි ලැව්රොව් (Sergey Lavrov) අනතුරු අඟවමින් ප්රකාශ කළේ, ඇමරිකාව සහ ඊශ්රායලය වැළැක්වීමට උත්සාහ කරන න්යෂ්ටික ව්යාප්තිය මෙම යුද්ධය හරහා තවදුරටත් වේගවත් විය හැකි බවයි. “ඇමරිකාව න්යෂ්ටික බෝම්බ ඇති රටවලට ප්රහාර එල්ල කරන්නේ නැහැ,” යනුවෙන් ප්රකාශ කළ ලැව්රොව් මහතා, මෙම ප්රහාර නිසා අනෙකුත් අරාබි රටවල් ද න්යෂ්ටික අවි ලබාගැනීමට පෙළඹිය හැකි බව පෙන්වා දුන්නේය.
රුසියාවේ මතය වන්නේ මෙම ප්රහාරය ස්වෛරී රාජ්යයකට එල්ල වූ “අපේක්ෂිත සහ අනවශ්ය ආයුධ සන්නද්ධ ආක්රමණයක්” බවයි. මෙම මානව කෘතිම අර්බුදයේ සහ ප්රචණ්ඩත්වයේ සියලු වගකීම ඇමරිකා එක්සත් ජනපදය සහ ඊශ්රායලය භාරගත යුතු බව රුසියානු විදේශ අමාත්යාංශය වැඩිදුරටත් සඳහන් කර ඇත.
