රුසියාවට අයත් ‘Arctic Metagaz’ නම් දැවැන්ත ස්වාභාවික ගෑස් ප්රවාහන නෞකාවක් මධ්යධරණී මුහුදේදී ඕනෑම මොහොතක පුපුරායාමේ බරපතල අවදානමකට ලක්ව ඇති බව ඉතාලි රජය අද (18) නිල වශයෙන් ප්රකාශ කළේය. මෙමඟින් කලාපයට දැඩි පාරිසරික බලපෑමක් එල්ල විය හැකි බවට බලධාරීන් අනතුරු අඟවයි.
මීට සති දෙකකට පෙර මුහුදු ඩ්රෝන (Sea Drone) ප්රහාරයකට ලක්ව ඇති මෙම නෞකාවේ බඳ කොටසට දැඩි හානි සිදුව ඇති අතර, එහි විශාල සිදුරක් නිර්මාණය වී තිබේ. මෙම ප්රහාරය යුක්රේනය විසින් එල්ල කරන්නට ඇතැයි දැනට සැක කෙරේ.
ප්රහාරයෙන් පසු නෞකාව අතහැර දමා ඇති අතර, වර්තමානය වන විට එහි කිසිදු කාර්ය මණ්ඩල සාමාජිකයෙකු නොමැති බව තහවුරු වී ඇත.
නෞකාව තුළ පවතින අධික වායු පීඩනය සහ සිදු වී ඇති තාක්ෂණික හානි හේතුවෙන් එය ඕනෑම මොහොතක දැවැන්ත පිපිරීමකට ලක්වීමේ අවදානමක් පවතින බව ඉතාලි ආරක්ෂක අංශ පෙන්වා දෙයි.
පිපිරීමක් සිදු වුවහොත් මධ්යධරණී මුහුදේ ජීව පද්ධතියට සහ අවට රටවල වෙරළ තීරයන්ට බරපතල හානි සිදුවිය හැකි බැවින්, ජාත්යන්තර සාගර කටයුතු පිළිබඳ ආයතනවල අවධානය මේ වෙත යොමුව තිබේ.
යුදමය වාතාවරණය මධ්යයේ සිදුවූ මෙම ප්රහාරය හේතුවෙන් බලශක්ති සැපයුමට ද බලපෑම් එල්ල විය හැකි බව ආර්ථික විචාරකයෝ පවසති. විශේෂයෙන්ම ජනාධිපතිවරයා පසුගියදා සඳහන් කළ බලශක්ති කළමනාකරණ වැඩපිළිවෙළට මෙවැනි ජාත්යන්තර සිදුවීම් වක්රව බලපෑම් කළ හැකිය.
