මධ්යම පෙරදිග කලාපයේ පවතින දේශපාලන සිතියම සම්පූර්ණයෙන්ම වෙනස් කිරීමටත්, ඉරාන පාලන තන්ත්රය අඩපණ කිරීමටත් මෙය උදා වී ඇති “ඓතිහාසික අවස්ථාවක්” බව සෞදි අරාබියේ ඔටුන්න හිමි මොහොමඩ් බින් සල්මාන් කුමරු (MBS) ඇමරිකානු ජනාධිපති ඩොනල්ඩ් ට්රම්ප් වෙත දන්වා තිබේ. නිව්යෝර්ක් ටයිම්ස් (NYT) පුවත්පත වාර්තා කරන පරිදි, ඉරානයට එල්ල කරන ප්රහාරයන් තවදුරටත් දැඩි කරන ලෙස සෞදි නායකයා ට්රම්ප්ගෙන් ඉල්ලා සිටින අතර, ඉරානය යනු ගල්ෆ් කලාපයට පවතින දිගුකාලීන තර්ජනයක් බව ඔහු පෙන්වා දී ඇත. වර්තමාන යුදමය වාතාවරණය හමුවේ ඉරාන රජය බලයෙන් පහ කිරීම කලාපීය ස්ථාවරත්වයට අත්යවශ්ය කරුණක් බව සෞදි පාර්ශවයේ අදහස වී තිබේ.
මෙම තත්ත්වයත් සමඟ මධ්යම පෙරදිග කලාපයේ රටවල් පැහැදිලි ලෙසම පාර්ශවයන් තෝරා ගනිමින් සිටින බව පෙනෙන්නට තිබේ. ඇමරිකාව සහ ඉරානය අතර පවතින මෙම සෘජු ගැටුමේදී සෞදි අරාබිය සහ එක්සත් අරාබි එමීර් රාජ්යය වැනි රටවල් ඇමරිකානු පාර්ශවය වෙත වැඩි නැඹුරුවක් දක්වන්නේ, ඉරානයේ යුද ශක්තිය හීන කිරීම තම ජාතික ආරක්ෂාවට වැදගත් වන බැවිනි. විශේෂයෙන්ම ඉරානය සතු මිසයිල පද්ධති සහ බලශක්ති යටිතල පහසුකම් ඉලක්ක කර ප්රහාර එල්ල කරන ලෙස සෞදි කුමරු කරන මෙම බලපෑම, කලාපීය දේශපාලනයේ පවතින දැඩි බෙදීම මැනවින් පිළිබිඹු කරන බව විදේශ වාර්තා පෙන්වා දෙයි.
කෙසේ වෙතත්, සෞදි අරාබිය ප්රසිද්ධියේ ප්රකාශ කරන්නේ තමන් සාමකාමී විසඳුමකට කැමති බවයි. නමුත් අභ්යන්තර රාජ්යතාන්ත්රික සාකච්ඡාවලදී ඔවුන් ට්රම්ප් පරිපාලනය දිරිමත් කරන්නේ ඉරානය කෙරෙහි පවතින හමුදාමය පීඩනය ලිහිල් නොකරන ලෙසයි. ඇමරිකාව මෙම යුද්ධයෙන් පසුබැස ගියහොත් තමන්ට ඉරානයේ පළිගැනීම්වලට තනිවම මුහුණ දීමට සිදුවනු ඇතැයි පවතින බිය මෙම ඉල්ලීමට ප්රධාන හේතුව වී ඇතැයි දේශපාලන විචාරකයෝ පවසති. මෙම “ඓතිහාසික අවස්ථාව” ප්රයෝජනයට ගනිමින් ඉරාන තර්ජනය සදහටම අවසන් කිරීමට සෞදි අරාබිය ඇතුළු මිත්ර රටවල් සියලු උපායමාර්ගික පියවර ගනිමින් සිටියි.
උපුටා ගැනීම: New York Times (NYT)
