වර්ෂ 2024 දෙසැම්බර් මාසයේදී යුද නීතිය පැනවීමට උත්සාහ කරමින් රාජ්ය විරෝධී කුමන්ත්රණයක් මෙහෙයවීම සම්බන්ධයෙන් චෝදනා ලැබ සිටින දකුණු කොරියාවේ හිටපු ජනාධිපති යූන් සුක් යොල් (Yoon Suk Yeol) සම්බන්ධයෙන් වන තීරණාත්මක නඩු තීන්දුව සෝල් මධ්යම දිස්ත්රික් අධිකරණය විසින් අද (19) ප්රකාශයට පත් කිරීමට නියමිතව තිබේ. මෙය දකුණු කොරියානු ඉතිහාසයේ එරට ජනාධිපතිවරයෙකු මුහුණ දෙන අතිශය බැරෑරුම් නඩු තීන්දුවක් ලෙස සැලකේ.
මෙම නඩුවේදී රජයේ අභිචෝදකයින් විසින් හිටපු ජනාධිපතිවරයාට මරණ දඬුවම ලබා දෙන ලෙස ඉල්ලා ඇති අතර, ඔහු විසින් පැනවූ යුද නීතිය ව්යවස්ථා විරෝධී බවත් එමඟින් එරට ප්රජාතන්ත්රවාදී ව්යුහයට දැඩි හානි සිදු කළ බවත් ඔවුන් පෙන්වා දෙයි. දකුණු කොරියානු නීතියට අනුව රාජ්ය විරෝධී කුමන්ත්රණයක් මෙහෙයවීමේ වරදට ලබා දිය හැකි උපරිම දඬුවම වන්නේ මරණ දඬුවමයි. කෙසේ වෙතත්, එරට 1997 වසරෙන් පසු කිසිදු මරණ දඬුවමක් ක්රියාත්මක කර නොමැති බැවින්, බොහෝ විචාරකයින් පවසන්නේ ඔහුට ජීවිතාන්තය දක්වා සිරදඬුවමක් හිමි වීමේ වැඩි ඉඩක් පවතින බවයි.
අද දින තීන්දුව ප්රකාශයට පත් කිරීමට නියමිත අධිකරණ සංකීර්ණය අවට දැඩි පොලිස් ආරක්ෂාවක් යොදවා ඇති අතර, හිටපු ජනාධිපතිවරයාට පක්ෂ සහ විපක්ෂ කණ්ඩායම් විශාල වශයෙන් එම ප්රදේශයට රැස්ව සිටිති. යූන් සුක් යොල් දැනටමත් බලය අනිසි ලෙස භාවිතා කිරීමේ චෝදනාවලට වරදකරු වී වසර 5ක සිරදඬුවමකට යටත්ව සිටින අතර, අද ලැබෙන තීන්දුව ඔහුගේ දේශපාලන සහ පෞද්ගලික අනාගතය සම්පූර්ණයෙන්ම තීරණය කරනු ඇත.
