ශ්රී ලංකා ක්රිකට් ක්රීඩාවට ලැදි ප්රේක්ෂකයන් හට ඉවසීමෙන් යුතුව කටයුතු කරන ලෙසත්, ජාතික කණ්ඩායම කෙරෙහි තැබූ විශ්වාසය අත්නොහරින ලෙසත් හිටපු සුපිරි වේගපන්දු යවන්නා වන ලසිත් මාලිංග ඉල්ලීමක් කරයි. තවත් අයි.සී.සී. (ICC) ලෝක කුසලානයක් දිනා ගැනීම ශ්රී ලංකාවට ඉතා ආසන්න බව ඔහු අවධාරණය කර සිටියි.
සිය නිල ෆේස්බුක් ගිණුමේ හැඟුම්බර සටහනක් තබමින් මාලිංග පෙන්වා දෙන්නේ 1996 වසරේ ශ්රී ලංකාව ලබාගත් පළමු ලෝක කුසලාන ජයග්රහණයේ සිට ගෙවී ආ ඓතිහාසික ගමන් මග පිළිබඳවයි. ඇතැම් තරගාවලිවලදී මූලික වටයෙන්ම ඉවත් වීමට සිදුවුවද, ලෝක කුසලාන අවසන් මහා තරග හතරකදීම පරාජයට පත්ව හදවත් බිඳී ගියද, සැබෑ ක්රිකට් ලෝලීන් සැමවිටම කණ්ඩායම සමඟ රැඳී සිටි බව ඔහු සිහිපත් කරයි. වසර ගණනාවක විවේචන සහ කලකිරීම් මධ්යයේ වුවද එම නොසැලෙන විශ්වාසය 2014 වසරේ විස්සයි-20 ලෝක කුසලාන ජයග්රහණයට මග පෑදූ බව ඔහුගේ අදහසයි.
“අතහැර දැමීම ක්රීඩාවට විසඳුමක් නොවේ” යැයි පවසන මාලිංග, ශ්රී ලංකාවට යළිත් ලෝක කුසලානයක් දිනාගත හැකි බවට දැඩි විශ්වාසයක් පළ කරයි. අවසන් වරට ලෝක කුසලානයක් දිනා වසර 12ක් ගතවී ඇතත්, ක්රීඩාව පිළිබඳ අවබෝධයක් ඇති සහ කණ්ඩායමට දැඩි ලෙස ආදරය කරන ප්රේක්ෂකයින් මීළඟ ජයග්රහණය තෙක් කණ්ඩායම ශක්තිමත් කරනු ඇති බව ඔහු වැඩිදුරටත් සඳහන් කරයි.
