මෙරට තුළ මත්ද්රව්ය ළඟ තබා ගැනීම සහ සුළු පරිමාණ අලෙවිය සම්බන්ධයෙන් දිනපතා සැකකරුවන් විශාල පිරිසක් අත්අඩංගුවට ගත්තද, ශ්රී ලංකාවේ ප්රධාන මත්ද්රව්ය ජාලය විදේශගතව සිටින ප්රධාන ජාවාරම්කරුවන් පස්දෙනෙකු (05) විසින් මෙහෙයවනු ලබන බව පොලිසිය අනාවරණය කරගෙන තිබේ. මධ්යම අපරාධ විමර්ශන කාර්යාංශයේ (CCIB) නියෝජ්ය පොලිස්පති චන්දන කොඩිතුවක්කු මහතා ප්රකාශ කළේ මෙම ජාවාරම්කරුවන් පස්දෙනාම ශ්රී ලාංකිකයන් වන අතර ඔවුන් දැනට ඩුබායි සහ යුරෝපීය රටවල සිට සිය මෙහෙයුම් ක්රියාත්මක කරන බවයි. මොවුන් මෙරට සිටින සිය ගෝලබාලයන් සමඟ සන්නිවේදනය කිරීම සඳහා අතිශය රහස්ය (Encrypted) සන්නිවේදන පද්ධති භාවිත කරන බව ද විමර්ශනවලදී හෙළි වී ඇත.
මෙම ජාවාරම්කරුවන් ඔවුන් පදිංචිව සිටින රටවල ඉහළ පෙළේ පුද්ගලයන් සමඟ ප්රබල සබඳතා ගොඩනඟාගෙන ඇති අතර සමහරුන් ද්විත්ව පුරවැසිභාවය ද ලබාගෙන සිටීම හේතුවෙන් ඔවුන් මෙරටට ගෙන්වා ගැනීම නීත්යානුකූලව අතිශය දුෂ්කර වී ඇති බව නියෝජ්ය පොලිස්පතිවරයා පෙන්වා දෙයි. සාමාන්යයෙන් මාධ්ය මඟින් නිතර ප්රසිද්ධ වන්නේ මෙරට තුළ මත්ද්රව්ය බෙදාහරින බිම් මට්ටමේ පුද්ගලයන්ගේ නම් වුවත්, සැබෑ මහමොළකරුවන් විදේශ රටවල සුඛෝපභෝගී ජීවිත ගත කරමින් ආරක්ෂිතව සිටින බව ඔහු වැඩිදුරටත් සඳහන් කළේය. මොවුන් මත්ද්රව්යවලින් උපයන කළු සල්ලි විශුද්ධිකරණය කිරීම (Money Laundering) සඳහා ශ්රී ලංකාව තුළ මහා පරිමාණ සංචාරක ව්යාපාර සහ හෝටල් ජාලයන් පවත්වාගෙන යන බව ද අනාවරණය වී තිබේ.
විමර්ශනවලට අනුව එක් ප්රධාන සැකකරුවෙකුගේ පුතුන් දෙදෙනෙකු මෙරට නගර සභාවක මන්ත්රීවරුන් ලෙස කටයුතු කරන බවත්, තවත් ජාවාරම්කරුවෙකු වෙරළබඩ ප්රදේශවල සිටින අඩු ආදායම්ලාභී පුද්ගලයන්ගේ නම්වලින් මහා පරිමාණ ව්යාපාර ලියාපදිංචි කර පවත්වාගෙන යන බවත් පොලිසිය පවසයි. දේශපාලන සහ ව්යාපාරික ක්ෂේත්රවල පවතින මෙම ප්රබල සබඳතා හේතුවෙන් මත්ද්රව්ය ජාලය මුළුමනින්ම මර්දනය කිරීම විශාල අභියෝගයක් වී ඇති අතර ජාත්යන්තර පොලිසියේ (Interpol) සහාය ඇතිව මෙම ජාවාරම්කරුවන් කොටු කර ගැනීමට ආරක්ෂක අංශ මේ වන විට විශේෂ මෙහෙයුම් දියත් කර ඇත.
