පවතින තත්ත්වය හමුවේ රට තුළ බලශක්තිය කාර්යක්ෂමව සහ ක්රමානුකූලව කළමනාකරණය කරගනිමින් භාවිත කරන ලෙස ශ්රී ලංකා සුනිත්ය බලශක්ති අධිකාරිය ජනතාවගෙන් ඉල්ලා සිටියි. එම අධිකාරියේ සභාපති මහාචාර්ය ටී.එම්.ඩබ්ලිව්.ජේ. බණ්ඩාර මහතා පෙන්වා දෙන්නේ මේ වන විට බොරතෙල් ආනයනය සීමා වී ඇති බැවින් විදුලි උත්පාදනය සඳහා අධික පිරිවැයක් සහිත ඩීසල් සහ අනෙකුත් පොසිල ඉන්ධන භාවිත කිරීමට සිදුව ඇති බවයි.
විශේෂයෙන් පස්වරු 5 සිට අලුයම දක්වා කාලය තුළ පොසිල ඉන්ධන දහනයෙන් විදුලිය නිපදවීමට සිදුවන බැවින් එම කාලය තුළ විදුලිය අරපිරිමැස්මෙන් භාවිත කිරීම වැදගත් වේ. දිවා කාලයේදී සූර්ය බලයෙන් විදුලිය උත්පාදනය වන බැවින්, හැකිතාක් සිය අත්යවශ්ය කටයුතු දිවා කාලයේදී සිදු කර ගැනීමට ජනතාව උනන්දු වන්නේ නම් විදුලි බල උත්පාදන වියදම මෙන්ම පෞද්ගලික විදුලි බිල ද අඩු කරගත හැකි බව සභාපතිවරයා පෙන්වා දෙයි.
බලශක්ති කාර්යක්ෂම උපාංග භාවිතයට යොමුවීමේ වැදගත්කම අවධාරණය කළ ඒ මහතා, LED බල්බ, ශීතකරණ සහ වායුසමන යන්ත්ර මිලදී ගැනීමේදී සුනිත්ය බලශක්ති අධිකාරියේ ලේබල් ක්රමවේදය පරීක්ෂා කරන ලෙස දන්වා සිටියි. එමෙන්ම අකාර්යක්ෂම උපාංග රට තුළට ගෙන්වීම වැළැක්වීම සඳහා නව නීති සකස් වෙමින් පවතින බවත්, බලශක්තිය සුරැකීම සඳහා රජය කෙටි කාලීන වැඩපිළිවෙළක් දැනටමත් ආරම්භ කර ඇති බවත් මහාචාර්ය බණ්ඩාර මහතා වැඩිදුරටත් සඳහන් කළේය.
