ඉරානය සමඟ පවතින යුදමය වාතාවරණය තීව්ර වෙමින් පවතින පසුබිමක, ඇෆ්ගනිස්ථානයේ පිහිටි උපායමාර්ගිකව වැදගත් බග්රම් (Bagram) ගුවන් කඳවුරේ පාලනය යළි ලබා ගැනීමට ඇමරිකාව උත්සාහ කරනු ඇතැයි රුසියාව සිය කනස්සල්ල පළ කර තිබේ. රුසියානු ජනාධිපති ව්ලැඩිමීර් පුටින්ගේ ඇෆ්ගනිස්ථාන විශේෂ නියෝජිත සමීර් කබුලොව් (Zamir Kabulov) ප්රකාශ කරන්නේ, බග්රම් කඳවුර ඉල්ලා ඇමරිකාව සිදුකරන බලපෑම් අලුත් දෙයක් නොවන බවයි.
1950 දශකයේ එවකට සෝවියට් සංගමය විසින් ඉදිකරන ලද මෙම කඳවුර, 2021 වසරේදී ඇමරිකානු හමුදා ඇෆ්ගනිස්ථානයෙන් ඉවත් වන තෙක් ඔවුන්ගේ ප්රධාන මධ්යස්ථානය ලෙස භාවිත විය. වත්මන් ට්රම්ප් පරිපාලනය විසින් මෙම කඳවුර යළි ලබා දෙන ලෙස ඇෆ්ගනිස්ථාන තලේබාන් රජයෙන් දිගින් දිගටම ඉල්ලා සිටින අතර, එය ලබා නොදුනහොත් “නරක දේවල් සිදුවිය හැකි බවට” (Bad things will happen) ජනාධිපති ට්රම්ප් මීට පෙර අනතුරු ඇඟවීම් ද සිදු කර ඇත.
රුසියාව අවධාරණය කරන්නේ ඇෆ්ගනිස්ථානය තුළ හෝ ඒ අවට කලාපයේ ඇමරිකානු හෝ නේටෝ (NATO) හමුදා යළි ස්ථාපිත වීම කිසිසේත් පිළිගත නොහැකි බවයි. මීට අමතරව, චීනයේ න්යෂ්ටික අවි පර්යේෂණාගාරවලට මෙම කඳවුර ඉතා සමීපව පිහිටා තිබීම ද ඇමරිකාව මෙය යළි ලබා ගැනීමට උත්සාහ කරන තවත් ප්රධාන හේතුවක් ලෙස විචාරකයෝ පෙන්වා දෙති. ඇෆ්ගනිස්ථාන තලේබාන් රජය දැනට පවසා ඇත්තේ සිය රටේ කිසිදු බිම් අඟලක් විදේශීය හමුදාවන්ට ලබා නොදෙන බවයි.
