ශ්රී ලංකාවේ දකුණු මුහුදු තීරයේදී අනතුරට පත් වූ ඉරාන නාවික හමුදාවට අයත් නෞකාවේ සිටි පුද්ගලයන් 35 දෙනෙකු නාවික හමුදාව විසින් සාර්ථකව මුදාගෙන තිබේ. ගාල්ල වරායට නාවික සැතපුම් 40ක් පමණ ඔබ්බෙන් වූ ජාත්යන්තර මුහුදු සීමාවේදී මෙම නෞකාව ආපදාවට ලක්ව ඇති අතර, ඉන් ලැබුණු හදිසි ඇමතුමකට අනුව ශ්රී ලංකා නාවික හමුදාව වහාම මුදාගැනීමේ මෙහෙයුම් ආරම්භ කළේය. මුදාගත් නාවිකයන් සියලු දෙනා මේ වන විට වැඩිදුර ප්රතිකාර සඳහා ගාල්ල කරාපිටිය ශික්ෂණ රෝහල වෙත ඇතුළත් කිරීමට පියවර ගෙන ඇති බව ආරක්ෂක අමාත්යාංශය තහවුරු කරයි.
අද (04) පාර්ලිමේන්තුවේදී විශේෂ ප්රකාශයක් කළ විදේශ කටයුතු අමාත්ය විජිත හේරත් මහතා සඳහන් කළේ, මෙම නෞකාව අනතුරට ලක්වන අවස්ථාවේදී ශ්රී ලංකා මුහුදු සීමාවෙන් බැහැරව තිබූ බවයි. කෙසේ වෙතත්, නෞකාව ගිලෙමින් පවතින බවට ලැබුණු පණිවිඩය මත පදනම්ව මානුෂීය මෙහෙයුමක් ලෙස නාවික හමුදාව මෙම කටයුත්ත සිදු කළ බව අමාත්යවරයා පැහැදිලි කළේය. සෝදිසි කිරීම් සහ මුදාගැනීමේ කටයුතු සඳහා සහාය වීමට ශ්රී ලංකා ගුවන් හමුදාව ද සිය ගුවන් යානයක් එම ප්රදේශය වෙත යොදවා තිබේ.
මෙම ඉරාන නෞකාවේ නාවිකයින් 180ක් පමණ සිටි බවට මීට පෙර වාර්තා පළ වූ අතර, ඉතිරි පිරිස සොයා තවදුරටත් පුළුල් මෙහෙයුමක් ක්රියාත්මක වේ. ආරක්ෂක නියෝජ්ය අමාත්ය විශ්රාමික මේජර් ජෙනරාල් අරුණ ජයසේකර මහතා ප්රකාශ කළේ, මුදාගත් පිරිසට අවශ්ය සියලුම වෛද්ය පහසුකම් ලබා දීමට සහ සිද්ධියට අදාළ ඉදිරි විමර්ශන කටයුතු සිදු කිරීමට ආරක්ෂක අංශ සූදානමින් පසුවන බවයි. පවතින අයහපත් මුහුදු තත්ත්වය හමුවේ වුවද නාවික හමුදා යාත්රා තවදුරටත් එම ප්රදේශයේ රැඳී සිටිමින් මෙහෙයුම් කටයුතු සිදු කරනු ලබයි.
