ලංකා විදුලිබල මණ්ඩලය ප්රතිව්යුහගත කිරීම සඳහා ඉදිරිපත් කර ඇති යෝජනාව සම්බන්ධයෙන් ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා සිය දැඩි අවධානය යොමු කර තිබේ. පැහැදිලි සංක්රාන්ති සැලසුමකින් තොරව මෙවැනි ආයතනයක් විසුරුවා හැරීම හරහා දැඩි අවිනිශ්චිතතාවක් මෙන්ම යහපාලන මූලධර්ම බිඳවැටීමක් සිදුවිය හැකි බවට ඔහු අනතුරු අඟවයි. ‘X’ සමාජ මාධ්ය ජාලය ඔස්සේ අදහස් දක්වමින් ඔහු පෙන්වා දෙන්නේ වසර 56ක ඉතිහාසයක් ඇති විදුලිබල මණ්ඩලය වෙනුවට රජය සතු සමාගම් හයක් පිහිටුවීම පමණක් අර්ථවත් ප්රතිසංස්කරණයක් නොවන බවයි.
මෙම ප්රතිව්යුහගත කිරීමේ ක්රියාවලිය ශ්රී ලංකා ශ්රේෂ්ඨාධිකරණයේ විභාග වෙමින් පවතින පසුබිමක මෙලෙස ඉදිරියට යාම හරහා සේවකයින් 22,000කගේ අනාගතය අවිනිශ්චිත වන බව ඔහු පෙන්වා දෙයි. ජාතික ආරක්ෂාවට සහ ආර්ථික පුනර්ජීවනයට අත්යවශ්ය උපායමාර්ගික දේපළක් වන විදුලිබල මණ්ඩලය බෙදා වෙන් කිරීම මගින් පරිපාලනමය අවුල් සහගත තත්ත්වයක් නිර්මාණය වන බව නාමල් රාජපක්ෂ මහතා වැඩිදුරටත් සඳහන් කරයි. හදිසි අත්හදා බැලීම් වෙනුවට තිරසාරභාවය, දැරිය හැකි මිල සහ බලශක්ති සුරක්ෂිතතාවය තහවුරු කරන විශ්වසනීය ජාතික බලශක්ති උපාය මාර්ගයක් අනුගමනය කිරීමේ අවශ්යතාව ඔහු මෙහිදී අවධාරණය කර ඇත.
