ශ්රී ලංකාවේ කුළුබඩු නිෂ්පාදන ජාත්යන්තර වෙළඳපොළේ ඉහළ අනන්යතාවක් සහිතව ප්රවර්ධනය කිරීම සඳහා අපනයන කෘෂිකර්ම දෙපාර්තමේන්තුව විසින් මේ වසරේදී කුළුබඩු ආශ්රිත “පොකුරු ගම්මාන” 200ක් ආරම්භ කිරීමට පියවර ගෙන තිබේ. “අපනයන කෘෂිමහිම” ජාතික වැඩසටහනට සමගාමීව ක්රියාත්මක වන මෙම ව්යාපෘතියේ සමාරම්භක උත්සවය හෙට (මාර්තු 10) පෙරවරු 10ට කෑගල්ල, දැදිගම ප්රාථමික විද්යාලයේදී කෘෂිකර්ම, පශු සම්පත්, ඉඩම් හා වාරිමාර්ග අමාත්ය කේ.ඩී. ලාල්කාන්ත මහතාගේ ප්රධානත්වයෙන් පැවැත්වීමට සියලු කටයුතු සූදානම් කර ඇත.
මෙම වැඩසටහන මගින් 2026 වසරේදී ගම්මාන 200ක් ආරම්භ කරමින් 2030 වන විට එය ගම්මාන 500ක් දක්වා වර්ධනය කිරීමට අපේක්ෂිත අතර, එමගින් වසර 2030 වන විට කුළුබඩු අපනයනයෙන් ඩොලර් මිලියන 455ක ආදායම් ඉලක්කයක් ජය ගැනීම රජයේ මූලික අරමුණයි. විදේශ වෙළඳපොළ අවශ්යතාවලට ගැලපෙන අයුරින් ප්රමිතියෙන් උසස් සහ අගය එකතු කළ (Value-added) නිෂ්පාදන සැකසීම කෙරෙහි මෙහිදී විශේෂ අවධානයක් යොමු කෙරෙන අතර, වගාකරුවන්, නිෂ්පාදකයන් සහ අපනයනකරුවන් ඒකරාශී කර “අපනයන කෘෂි නිෂ්පාදන සමිති” ලෙස සංවිධානය කිරීම හරහා ශ්රී ලාංකේය කුළුබඩුවල අනන්යතාව ලොව පුරා තහවුරු කිරීමට අපේක්ෂා කෙරේ.
මෙම ව්යාපෘතිය ක්රියාත්මක කිරීමේදී පළමු වසර දෙක තුළ වගාකරුවන් වෙත මූලික වගා තාක්ෂණය ලබා දී නිෂ්පාදන ධාරිතාව ඉහළ නැංවීමට කටයුතු කරන අතර, ඉන් අනතුරුව නිෂ්පාදන සහතික කිරීම සහ විදේශ වෙළඳපොළ සමඟ සෘජුව සම්බන්ධීකරණය කිරීමේ කටයුතු සිදු කරන බව අපනයන කෘෂිකර්ම දෙපාර්තමේන්තුවේ අතිරේක අධ්යක්ෂ ජනරාල් උපුල් රණවීර මහතා වැඩිදුරටත් සඳහන් කළේය.
