ශ්රී ලංකාවට පැමිණෙන සංචාරකයන්ගේ සංඛ්යාව මේ වසරේ මුල් මාස දෙකකටත් අඩු කාලය තුළදී ලක්ෂ පහේ සීමාව (500,000) ඉක්මවා ගොස් ඇති බව ශ්රී ලංකා සංචාරක සංවර්ධන අධිකාරියේ (SLTDA) නවතම සංඛ්යාලේඛන අනාවරණය කරයි. එම වාර්තාවලට අනුව, 2026 ජනවාරි 01 වනදා සිට පෙබරවාරි 22 වනදා දක්වා කාලය තුළ සංචාරකයන් 505,751 දෙනෙකු මෙරටට පැමිණ තිබේ.
පෙබරවාරි මාසයේ පළමු දින 22 තුළ පමණක් සංචාරකයන් 228,424 දෙනෙකු මෙරටට පැමිණ ඇති අතර, එය සංචාරක ක්ෂේත්රයේ ප්රබල වර්ධනයක් පෙන්නුම් කරයි. විශේෂයෙන්ම පෙබරවාරි මාසයේ මුල් සති තුනේදීම සතිපතා පැමිණීම් සංඛ්යාව 70,000 සීමාව ඉක්මවා යාම සුවිශේෂී වේ. මේ වසරේ ජනවාරි මාසයේදී ද සංචාරකයන් 277,327 දෙනෙකු පැමිණ තිබූ අතර එය ජනවාරි මාසයක් සඳහා වාර්තා වූ ඉහළම පැමිණීම ලෙස සටහන් විය.
සංචාරක වෙළඳපොළ දෙස බැලීමේදී, පෙබරවාරි මාසයේ මුල් දින 22 තුළ වැඩිම සංචාරකයන් පිරිසක් පැමිණ ඇත්තේ ඉන්දියාවෙන් (16%) වන අතර, දෙවන ස්ථානය එක්සත් රාජධානියට (11%) හිමිව තිබේ. මේ දිනවල ශ්රී ලංකාවේ පැවැත්වෙන 2026 පන්දුවාර විස්සයි විස්ස ලෝක කුසලාන ක්රිකට් තරගාවලිය මෙම සංචාරක ආකර්ෂණය ඉහළ නැංවීමට ප්රධාන වශයෙන් හේතු වූ බව බලධාරීහු පෙන්වා දෙති. වසරේ ඉදිරි මාසවලදී ද මෙම ප්රවණතාව අඛණ්ඩව පවත්වා ගැනීමට රජය අපේක්ෂා කරයි.
