ඕස්ට්රේලියානු අපනයන මූල්ය ආයතනයට ගෙවීමට තිබූ ඩොලර් මිලියන 2.5ක මුදලක් භාණ්ඩාගාරයෙන් අතුරුදන් වීමේ බිහිසුණු පුවතින් මුළු රටම කැළඹී දින කිහිපයක් ගතවන්නටත් මත්තෙන්, රජයේ මුදල් පද්ධතියේ පවතින තවත් මාරක සිදුරක් පිළිබඳව ඊයේ (28) අතිශය කම්පනීය තොරතුරක් අනාවරණය විය. කැබිනට් ප්රකාශක අමාත්ය නලින්ද ජයතිස්ස මහතා විසින් හෙළි කළ පරිදි, මෙරට මහජනතාවගේ බදු මුදල්වලින් වෙන් කළ තවත් දැවැන්ත ඩොලර් තොගයක් විදේශ රටකට ගෙවීමට යාමේදී අඩමඟදී අතුරුදන් වී තිබේ. රාජ්ය මූල්ය පාලනයේ සුරක්ෂිතතාව පිළිබඳව බරපතළ ප්රශ්නාර්ථයක් මතු කරමින් දිග හැරෙන මෙම සිදුවීම් දාමය හුදෙක් සොරකමක් පමණක් නොව, එය මෙරට ආර්ථිකයේ මර්මස්ථාන ඉලක්ක කරගත් සැලසුම් සහගත මූල්ය කොල්ලයක ස්වරූපයක් ගෙන ඇත.
මෙම අලුත්ම වංචාව වාර්තා වන්නේ ශ්රී ලංකා තැපැල් දෙපාර්තමේන්තුව හරහා ඇමෙරිකානු තැපැල් සේවය (US Post) වෙත ගෙවීමට නියමිතව තිබූ ඇමෙරිකානු ඩොලර් 625,000ක මුදලක් සම්බන්ධයෙනි. ශ්රී ලංකා තැපෑල විසින් එම මුදල් නිදහස් කර ඇති බව වාර්තා වුවද, අදාළ ගෙවීම තමන් වෙත නොලැබුණු බවට ඇමෙරිකානු තැපැල් සේවය විසින් කරන ලද පැමිණිල්ලක් සමඟ මෙම අභිරහස් අතුරුදන් වීම කරළියට පැමිණ තිබේ. අමාත්යවරයා සඳහන් කළේ අවස්ථා දෙකකදී සිදු කළ මෙම ගෙවීම්වලට සිදුවූයේ කුමක්ද යන්න සෙවීමට තැපැල් දෙපාර්තමේන්තුව සහ අපරාධ විමර්ශන දෙපාර්තමේන්තුව (CID) මේ වන විටත් දැවැන්ත විමර්ශනයක් ආරම්භ කර ඇති බවයි.
ඕස්ට්රේලියාවට සහ ඇමෙරිකාවට යැවීමට තිබූ මෙම මුදල් කොල්ලකෑම් දෙක අතර කිසියම් අභ්යන්තර සම්බන්ධතාවයක් පවතින්නේද යන්න පිළිබඳව මෙතෙක් නිශ්චිත නිගමනයකට පැමිණ නොමැති වුවද, දූෂිත නිලධාරීන් ඉලක්ක කරගනිමින් නීතිය දැඩිව ක්රියාත්මක කිරීමට රජය තීරණය කර තිබේ. රජයේ ආයතන මට්ටමින් සිදුවන මෙවැනි අතිවිශාල මූල්ය වංචා පිළිබඳව අධිකරණයට කරුණු වාර්තා කිරීමට කටයුතු යොදා ඇති අතර, වගකිවයුත්තන් කවුරුන් වුවද ඔවුන්ට උපරිම දඬුවම් ලබා දෙන බව අමාත්යවරයා අවධාරණය කළේය. මහජන මුදල් අතපත ගාන සෙවනැලි දඩයම් කිරීමේ මෙම මෙහෙයුම, රටේ මූල්ය විනය යළි ස්ථාපිත කිරීමේ තීරණාත්මක සටනක් වනු නොඅනුමානය.
