නව අධ්යාපන ප්රතිසංස්කරණ යටතේ උසස් පෙළ වෘත්තීය විෂය ධාරාව, වර්තමාන පරම්පරාවේ ප්රවණතා සහ කර්මාන්ත ක්ෂේත්රයේ අවශ්යතාවලට ගැළපෙන අයුරින් නව්යකරණය කිරීමට තීරණය කර ඇති බව අග්රාමාත්ය ආචාර්ය හරිනි අමරසූරිය මහත්මිය ප්රකාශ කළාය. ඉසුරුපාය අධ්යාපන අමාත්යාංශ පරිශ්රයේ පැවති සාකච්ඡාවකදී ඇය මේ බව සඳහන් කළ අතර, එහිදී මෙම විෂය ධාරාවේ ව්යුහය සහ සහතිකකරණ ක්රියාවලිය සම්බන්ධයෙන් අදහස් හා නිර්දේශ ලබා ගැනීම සිදු කෙරිණි.
උසස් පෙළ වෘත්තීය විෂය ධාරාව සංශෝධනය කිරීමේදී අනුගමනය කළ යුතු මූලික නිර්ණායක සහ උසස් අධ්යාපනය සඳහා විවෘත වන නව ප්රවේශ මාර්ග පිළිබඳව මෙහිදී දීර්ඝ වශයෙන් සාකච්ඡා විය. ක්රමවත් තත්ත්ව සහතිකකරණ ක්රියාවලියක් ඔස්සේ සිසුන්ට පිළිගත් වෘත්තීය ජීවිතයක් සඳහා අවශ්ය පදනම සකස් කිරීමේ වැදගත්කම අවධාරණය කළ අග්රාමාත්යවරිය, වෘත්තීය විෂය ධාරාවට වැඩි වටිනාකමක් ලබා දීම සඳහා නිසි තේරීම් ක්රමවේදයක් යටතේ සිසුන් ඇතුළත් කර ගැනීමේ අවශ්යතාව පෙන්වා දුන්නාය.
උසස් අධ්යාපනය සඳහා ඇති ප්රවේශය පුළුල් කරමින් පාර්ශ්වික ඇතුළත් වීම් (Lateral Entry) ක්රමවේදයක් හඳුන්වා දීමේ වැදගත්කම සහ වෘත්තීය අධ්යාපනයේ සමාජීය හා ආර්ථික වටිනාකම පිළිබඳව ජනතාව දැනුවත් කිරීමේ වැඩසටහන්වල අවශ්යතාව ද ඇය මෙහිදී පැහැදිලි කළාය. මෙම සාකච්ඡාව සඳහා අධ්යාපන හා උසස් අධ්යාපන නියෝජ්ය අමාත්ය වෛද්ය මධුර සෙනෙවිරත්න මහතා, අමාත්යාංශ ලේකම් නාලක කළුවැව මහතා සහ ජාතික අධ්යාපන ආයතනයේ අධ්යක්ෂ ජනරාල් ජ්යෙෂ්ඨ මහාචාර්ය ඕ. ජී. දයාරත්න බණ්ඩා මහතා ඇතුළු පිරිසක් සහභාගී වූහ.
