මැදපෙරදිග කලාපයේ උද්ගතව ඇති “Operation Epic Fury” යුදමය වාතාවරණය හමුවේ ඊශ්රායලයේ සේවය කරන 29,000කට අධික ශ්රී ලාංකිකයන්ගේ ආරක්ෂාව සහ සුබසාධනය පිළිබඳව සොයා බැලීම සඳහා විදේශ අමාත්ය විජිත හේරත් මහතා අද (05) ඊශ්රායල විදේශ අමාත්ය ගිඩියොන් සාර් (Gideon Sa’ar) මහතා සමඟ විශේෂ දුරකථන සංවාදයක නිරත විය. ඉරානය සහ ඊශ්රායලය අතර ගැටුම් උත්සන්න වී ඇති මොහොතක, විදේශගතව සිටින මෙරට පුරවැසියන්ගේ ජීවිත ආරක්ෂාව රජයේ ප්රමුඛතම වගකීමක් බව අමාත්යවරයා මෙහිදී අවධාරණය කළේය.
මෙම සාකච්ඡාවේදී ඊශ්රායල විදේශ අමාත්යවරයා සහතික වී ඇත්තේ එහි වෙසෙන ශ්රී ලාංකිකයන්ගේ ආරක්ෂාව වෙනුවෙන් උපරිම පියවර ගන්නා බවයි. තවද, කලාපීය සාමය උදාකර ගැනීම සඳහා යුදමය ක්රියාමාර්ග වෙනුවට රාජ්ය තාන්ත්රික නාලිකා (Diplomatic channels) භාවිතා කිරීමේ හදිසි අවශ්යතාවය පිළිබඳව ද අමාත්යවරුන් දෙපල අදහස් හුවමාරු කර ගත්හ. ඊයේ (04) ඉරාන විදේශ අමාත්යවරයා සමඟ පැවැත්වූ සාකච්ඡාවෙන් අනතුරුව අද දින ඊශ්රායල පාර්ශවය සමඟ ද මෙලෙස සම්බන්ධ වීම හරහා ශ්රී ලංකාව මධ්යස්ථ විදේශ ප්රතිපත්තියක් අනුගමනය කරන බව යළිත් තහවුරු විය.
විදේශගත ශ්රී ලාංකිකයන්ගේ ආරක්ෂාව තහවුරු කිරීම සඳහා විදේශ කටයුතු අමාත්යාංශය සහ ඊශ්රායලයේ ශ්රී ලංකා තානාපති කාර්යාලය පැය 24 පුරා ක්රියාත්මක විශේෂ සම්බන්ධීකරණ ඒකකයක් ස්ථාපිත කර තිබේ. විශේෂයෙන්ම ඊශ්රායලයේ කෘෂිකාර්මික සහ සාත්තු සේවා ක්ෂේත්රවල නිරත ශ්රී ලාංකිකයන්ට අවශ්ය උපදෙස් සහ හදිසි සහාය ලබා දීමට කටයුතු යොදා ඇති බව අමාත්ය හේරත් මහතා සිය ‘X’ ගිණුම හරහා සඳහන් කළේය.
මෙම යුදමය තත්ත්වය නිසා ඊශ්රායලයේ සේවය කරන ශ්රී ලාංකිකයන්ට සිය සේවා ස්ථානවලින් බැහැර වීමට හෝ මෙරටට පැමිණීමට අවශ්ය වුවහොත් ඒ සඳහා අවශ්ය පහසුකම් සැලසීම පිළිබඳව ද රජයේ අවධානය යොමු වී ඇත. කලාපීය බලවතුන් අතර පවතින ගැටුම් හමුවේ වුවද, තම පුරවැසියන්ගේ ආරක්ෂාව වෙනුවෙන් ශ්රී ලංකා රජය ජාත්යන්තර මට්ටමින් සක්රීයව මැදිහත් වීම විදේශ සේවා නියුක්තිකයන්ගේ සහ ඔවුන්ගේ පවුල්වල සාමාජිකයන්ගේ දැඩි ඇගයීමට ලක්ව තිබේ.
