මැදපෙරදිග කලාපයේ පවතින යුදමය වාතාවරණය සහ ගුවන් ගමන් සීමා හේතුවෙන් සෞදි අරාබි ගුවන්තොටුපළේ ශ්රී ලාංකිකයන් 109 දෙනෙකු සහ ඕමාන් ගුවන්තොටුපළේ 22 දෙනෙකු අතරමංව සිටින බව විදේශ කටයුතු අමාත්ය විජිත හේරත් මහතා අද (04) පාර්ලිමේන්තුවේදී ප්රකාශ කළේය. ඕමාන් ගුවන්තොටුපළේ සිටි පිරිසෙන් කොටසක් අද අලුයම දිවයිනට පැමිණි ඕමාන් එයාර් ගුවන් යානයෙන් මෙරටට පැමිණෙන්නට ඇති බව ද අමාත්යවරයා සඳහන් කළේය. විපක්ෂ නායක සජිත් ප්රේමදාස මහතා මතු කළ ප්රශ්නයකට පිළිතුරු දෙමින් අමාත්යවරයා පවසා සිටියේ කලාපීය රටවල් පනවා ඇති ආරක්ෂක විධිවිධානවලට අනුකූලව රජය කටයුතු කරන බවයි.
මැදපෙරදිග වෙසෙන තම ඥාතීන් සමඟ සන්නිවේදනය බිඳ වැටී ඇති බවට පුද්ගලයන් සිව්දෙනෙකු බලධාරීන්ට දැනුම් දී ඇති අතර, තවත් පිරිසක් යුද තත්ත්වය පිළිබඳ විමසීම් කර ඇති බව ද මෙහිදී හෙළි විය. කෙසේ වෙතත්, මැදපෙරදිග ගැටුම් හේතුවෙන් මෙරටට ලැබෙන විදේශ ප්රේෂණවල අඩුවීමක් සිදුව නොමැති බවත්, ඉන්ධන නෞකා සිංගප්පූරුව සහ දකුණු කොරියාව හරහා පැමිණෙන බැවින් ඉන්ධන සැපයුමට බාධාවක් නොමැති බවත් අමාත්යවරයා අවධාරණය කළේය. රජය මෙම තත්ත්වය ඉතා සාධනීය ලෙස කළමනාකරණය කරමින් සිටින බව අමාත්යවරයා පවසද්දී, විපක්ෂ නායකවරයා පෙන්වා දුන්නේ තත්ත්වය තවත් දරුණු වනු ඇතැයි උපකල්පනය කරමින් රජය සූදානම් විය යුතු බවයි.
