එළැඹෙන සිංහල හා හින්දු අලුත් අවුරුදු උත්සවය නිමිත්තෙන් අප්රේල් මස 13 සහ 14 යන දෙදින තුළ දිවයින පුරා පිහිටි සියලුම මත්පැන් අලෙවිසල් වසා තැබීමට සුරාබදු දෙපාර්තමේන්තුව තීරණය කර තිබේ. සුරාබදු මාධ්ය ප්රකාශක, නියෝජ්ය සුරාබදු කොමසාරිස් ඒ.ඒ. රොෂාන් පෙරේරා මහතා නිවේදනයක් නිකුත් කරමින් සඳහන් කර ඇත්තේ රජයේ අනුමැතිය මත මෙම පියවර ගෙන ඇති බවයි. අලුත් අවුරුදු චාරිත්ර ඉටු කරන කාලසීමාව තුළ මහජන සාමය සහ සංස්කෘතික වටිනාකම් සුරැකීම මෙහි ප්රධාන අරමුණ වී තිබේ.
මෙම නියෝගයට අනුව දිවයින පුරා ක්රියාත්මක වන සියලුම රටබීම හල්, සුරාසල් මෙන්ම මත්පැන් අලෙවි කරන හෝටල්, ආපනශාලා සහ කැරෝකි මධ්යස්ථාන ද අදාළ දින දෙකේදී අනිවාර්යයෙන්ම වසා තැබිය යුතුය. කිසියම් බලපත්රලාභියෙකු මෙම නීතිය උල්ලංඝනය කරමින් හොර රහසේ හෝ ප්රසිද්ධියේ මත්පැන් අලෙවි කරනු ලැබුවහොත්, ඔවුන්ට එරෙහිව සුරාබදු නීතිය යටතේ දැඩි ක්රියාමාර්ග ගන්නා බවත් ඔවුන්ගේ බලපත්ර අවලංගු කිරීමට පවා කටයුතු කරන බවත් බලධාරීන් අවධාරණය කරයි.
අලුත් අවුරුදු සමය තුළ මෙවැනි නීති විරෝධී මත්පැන් අලෙවි කිරීම් සහ සුරාබදු නීතිය උල්ලංඝනය කරන ස්ථාන වැටලීම සඳහා දිවයින පුරා විශේෂ සුරාබදු වැටලීම් ඒකක සහ නිලධාරීන් යෙදවීමට ද පියවර ගෙන ඇත. මහජනතාවට ද මෙවැනි අක්රමිකතා පිළිබඳව තොරතුරු පවතී නම් සුරාබදු දෙපාර්තමේන්තුවේ ක්ෂණික ඇමතුම් අංක හරහා දැනුම් දීමේ හැකියාව පවතී.
