සූරියවැව, අන්දරවැව උස්ගල ප්රදේශයේ නිවසක පැවති මත්පැන් සාදයක් අතරතුර ඇති වූ පුද්ගලික ආරවුලක් දුරදිග යාමෙන් සිදු වූ පහරදීමකින් 42 හැවිරිදි පුද්ගලයෙකු ඊයේ (17) අලුයම ජීවිතක්ෂයට පත්ව තිබේ. මෙලෙස ඝාතනයට ලක්ව ඇත්තේ එදිරිමාන්නගේ රවීන්ද්ර කුමාර නැමති එම ප්රදේශයේම පදිංචිකරුවෙකි. පොලිසිය පවසන පරිදි, මියගිය පුද්ගලයා පසුගිය 16 වනදා රාත්රී සිය සහෝදරියගේ නිවසට ගොස් ඇති අතර, එහිදී සිය මස්සිනා සමඟ මත්පැන් පානය කරමින් සිටියදී දෙදෙනා අතර පැවති පැරණි අමනාපකමක් මතුවීම මෙම ගැටුමට හේතු වී ඇත.
මෙම බහින්බස්වීම සමතයකට පත් කිරීමට සැකකරුගේ බිරිඳ උත්සාහ කර ඇති අතර, එහිදී සැකකරු ඇයටද පහර දී තිබේ. පහරදීමෙන් ඇය සිහිමුර්ජා වී බිම ඇද වැටුණු පසු සැකකරු සිය මස්සිනාට ද අමානුෂික ලෙස පහර දී ඇති බව මූලික විමර්ශනවලදී හෙළි වී ඇත. බරපතල තුවාල ලැබූ රවීන්ද්ර කුමාර සූරියවැව රෝහලට ඇතුළත් කිරීමෙන් පසු මියගොස් ඇති අතර, ඝාතනය සිදුකළ සැකකරු මේ වන විට ප්රදේශයෙන් පළාගොස් තිබේ. සැකකරු අත්අඩංගුවට ගැනීම සඳහා සූරියවැව පොලිසිය විශේෂ මෙහෙයුමක් ආරම්භ කර ඇත.
මේ අතර, පවතින බලශක්ති අර්බුදය හමුවේ ඉන්ධන, ගෑස් සහ ගල් අඟුරු හදිසි මිලදී ගැනීම් සඳහා කැබිනට් අනුමැතිය හිමිව ඇති අතර, හෙට (බදාදා) රජයේ නිවාඩු දිනයක් බැවින් පාර්ලිමේන්තුව ද රැස් නොවන බව වාර්තා වේ. මැදපෙරදිග යුද වාතාවරණය හේතුවෙන් ජනාධිපති ට්රම්ප්ගේ චීන සංචාරය ද කල් ගොස් ඇති පසුබිමක, මෙරට ඉන්ධන කෝටාව සෑම සතියකම සෙනසුරාදා මධ්යම රාත්රිය දක්වා වලංගු වන බව ඛණිජ තෙල් නීතිගත සංස්ථාව නැවත මතක් කර දෙයි.
