ජාතික නිවාස සංවර්ධන අධිකාරිය සතු නිවාස ව්‍යාපෘති 04ක් ආශ්‍රීතව යොෂිඩා පදනම මඟින් පවත්වාගෙන යන පෙර පාසල් සහිත භූමිය එම පදනමට පවරා තිබේ.
මෙම පියවර ගෙන ඇත්තේ නාගරික සංවර්ධන හා නිවාස අමාත්‍ය ප්‍රසන්න රණතුංග මහතාගේ උපදෙස් පරිදියි.
ඒ අනුව කලුතර මත්තේගොඩ, නුවරඑළිය කුමාරගම, හොරණ අමරගම හා නිට්ටඹුව රංපොකුණගම ජාතික නිවාස සංවර්ධන අධිකාරියට අයත් නිවාස ව්‍යාපෘති ආශ්‍රීතව යෝෂිඩා පදනම පෙර පාසල් පවත්වාගෙන ගිය ඉඩම් එම පදනමට පැවරූ බව ජාතික නිවාස සංවර්ධන අධිකාරියේ සභාපති රජීව් සූරියආරච්චි මහතා පවසයි. ඊට අදාල හිමිකම් ඔප්පු ප්‍රදානය පසුගිය සතියේ ජනාධිපති රනිල් වික්‍රමසිංහ මහතා අතින් සිදු කෙරුණු බවද සභාපතිවරයා කියයි .
හිටපු ජනාධිපති රණසිංහ ප්‍රේමදාස මහතාගේ පාලන කාලයේ ගම්උදා ව්‍යාපෘතිය යටතේ ජාතික නිවාස සංවර්ධන අධිකාරිය මෙම නිවාස ව්‍යාපෘති 04 ආරම්භ කර තිබිණ. එම නිවාස ව්‍යාපෘති ආරම්භ කළ කාලයේදීම යෝෂිඩා පදනම මඟින් එහි ජීවත් වන දරුවන්ගේ අධ්‍යාපන හා සුබ සාධන කටයුතු උදෙසා පෙර පාසල් ආරම්භ කර තිබේ. ඒ හිටපු ජනාධිපති ජනාධිපති රණසිංහ ප්‍රේමදාස මහතාගේම ඉල්ලීමකට අනුව එම පෙර පාසල් එම ස්ථානවල පවත්වාගෙන ගොස් ඇත්තේ ජපාන ආධාර යටතේයි.
යෝෂිඩා පදනම මඟින් මෙම ස්ථානයන්හි පෙර පාසල් පවත්වාගෙන ගියද එම ඉඩම් කොටස්වල හිමිකාරිත්වය නොමැතිවීම නිසා ඒවා සංවර්ධනය කිරීමේ විවිධ ගැටළු පැන නැගී තිබිණි.
යෝෂිඩා පදනමේ ප්‍රධාන අනුශාසක පූජ්‍ය බානගල උපතිස්ස හිමියන් විසින් මීට පෙර සිටි රාජ්‍ය නායකයින් හතර දෙනෙකුටත් නිවාස විෂය භාර අමාත්‍යවරු 10 දෙනෙකුට අධික පිරිසකටත් එම ඉඩම් කොටස් නිරවුල් කර සින්නක්කර හිමිකාරිත්වය ලබාදෙන මෙන් ඉල්ලීම් කර තිබුණද එය ඉටු නොවූ බව සභාපතිවරයා කියයි.
වත්මන් නාගරික සංවර්ධන හා නිවාස අමාත්‍ය ප්‍රසන්න රණතුංග මහතා වෙතද පූජ්‍ය බානගල උපතිස්ස හිමියෝ සිය ගැටළුව ඉදිරිපත් කළහ. ඒ සම්බන්ධයෙන් අවධානය යොමු කළ ඇමති ප්‍රසන්න මහතා ජාතික නිවාස සංවර්ධන අධිකාරියේ සභාපති රජීව් සූරියආරච්චි මහතාට උපදෙස් දුන්නේ ඒ සම්බන්ධව නීත්‍යානූකූලව අවශ්‍ය පියවර ගන්නා ලෙසයි.
මෙම ඉඩම්වල සින්නකර හිමිකාරිත්වය ලබා දුන්නේ නිත්‍යානුකූල ක්‍රමවේදයට අනුව බවත්. ජාතික නිවාස සංවර්ධන අධිකාරියේ පනත අනුව නිවාස සංකීර්ණ පවත්වාගෙන යන ස්ථානවල සුබ සාධන වැඩසටහන් සඳහා අදාල ඉඩම් පැවරීමේ අයිතිය නිවාස සංවර්ධන අධිකාරිය සතු බවත් පෙන්වා දෙන සභාපතිවරයා පනතේ වගන්ති ප්‍රකාරව මේ සඳහා අවශ්‍ය පියවර ගත් බවද කියා සිටී.
ප්‍රදීප් අනුර කුමාර
