ප්රසිද්ධ ගොල්ෆ් ක්රීඩක ටයිගර් වුඩ්ස්ට එරෙහිව පවරා ඇති බීමත්ව රිය පැදවීමේ (DUI) නඩුවට අදාළව, ඔහු භාවිතා කළ වෛද්ය බෙහෙත් වට්ටෝරු පිළිබඳ වාර්තා ලබා ගැනීමට ඇමරිකානු අභිචෝදකයින් පියවර ගෙන තිබේ. පසුගිය මාසයේ ෆ්ලොරිඩාහිදී සිදුවූ රිය අනතුරකින් පසු ඔහු අත්අඩංගුවට පත් වූ අතර, එම අවස්ථාවේදී ඔහු කිසියම් ඖෂධ වර්ගයක් භාවිත කර සිටියේද යන්න තහවුරු කර ගැනීම මෙම පරීක්ෂණයේ අරමුණයි. විශේෂයෙන්ම බෙහෙත් බෝතල්වල සඳහන් මාත්රාවන් සහ ඒවා භාවිතයෙන් පසු රිය පැදවීම සම්බන්ධයෙන් ලබා දී ඇති අනතුරු ඇඟවීම් පිළිබඳ තොරතුරු මෙහිදී ලබා ගැනීමට නියමිතය.
අනතුර සිදුවූ අවස්ථාවේ ලබාගත් පොලිස් වීඩියෝ දර්ශනවලට අනුව, ටයිගර් වුඩ්ස් පවසා ඇත්තේ තමා ජංගම දුරකථනය දෙස බැලූ මොහොතේ මෙම අනතුර සිදුවූ බවයි. ඔහු මධ්යසාර පරීක්ෂණයෙන් සමත් වුවද, වෙනත් මත්ද්රව්ය පිළිබඳ මුත්රා පරීක්ෂණයකට පෙනී සිටීම ප්රතික්ෂේප කර ඇත. කෙසේ වෙතත්, ඔහුගේ සාක්කුවේ තිබී ‘හයිඩ්රොකොඩෝන්’ (Hydrocodone) නැමති වේදනා නාශක පෙති දෙකක් හමුවූ බව බලධාරීන් වාර්තා කළේය. පොලිස් නිලධාරීන් සැක කරන්නේ කිසියම් නාඳුනන ද්රව්යයක් හේතුවෙන් ඔහුගේ සාමාන්ය ක්රියාකාරිත්වය අඩාල වී ඇති බවයි.
මෙම සිදුවීම සම්බන්ධයෙන් ටයිගර් වුඩ්ස් සිය ‘X’ ගිණුම හරහා ප්රකාශයක් කරමින් සඳහන් කර සිටියේ, තමා පත්ව සිටින තත්ත්වයේ බරපතලකම තේරුම් ගන්නා බවත්, ප්රතිකාර ලබා ගැනීම සහ සෞඛ්යය කෙරෙහි අවධානය යොමු කිරීම සඳහා තාවකාලිකව ක්රීඩාවෙන් ඉවත් වන බවත්ය. මෙය ටයිගර් වුඩ්ස් බීමත්ව රිය පැදවීමේ සැකය මත අත්අඩංගුවට පත් වූ දෙවන අවස්ථාව වන අතර, මීට පෙර 2017 වසරේදී ද මෙවැනිම සිදුවීමක් වාර්තා විය. අදාළ වෛද්ය වාර්තා කැඳවීමේ නියෝගය අප්රේල් 22 වනදා නිකුත් කිරීමට නියමිත අතර, එයට එරෙහි වීමට ඔහුගේ නීතිඥයින්ට දින 10 ක කාලයක් පවතී.
